Ս.թ. նոյեմբերի 6-ին հիմնաքարի տեղադրման հանդիսավոր արարողությամբ «Փրոփերթի Դիվելոփմենթ Քամփնի» ՓԲԸ-ն Հայաստանում մեկնարկեց «Կամար» բազմաֆունկցիոնալ համալիրի կառուցման նախագիծը: Շինարարության միջազգային նորարարական չափանիշներով նախագծված համալիրը Հայաստանում առաջին «կանաչ» բիզնես-կենտրոնի նախագիծն է, որը շինարարության ավարտից հետո կհավաստագրվի BREEAM-ի (BRE Environmental Assessment Method)՝ այսօր աշխարհում «կանաչ» շինությունների էկոլոգիական գնահատման և դասակարգման առաջատար համակարգերից մեկի կողմից: Նման եզակի «Ա» դասի բիզնես-կենտրոնի կառույցն ապահովելու է էներգախնայողության և էկոլոգիական շինարարության բոլոր չափանիշները, որոնք ընդունված են միջազգային պրակտիկայում, և էապես նպաստելու է Հայաստանում բիզնես- կենտրոնների շինարարության ստանդարտների զարգացմանը:
Շենքի սեփականատերը՝ «Փրոփերթի Դիվելոփմենթ Քամփնի» ՓԲԸ-ն, կարևորելով այդ տարածքի կառույցների ճարտարապետական նշանակությունր և այն պահպանելու ու գալիք սերունդներին ժառանգելու առաքելությունր, մեծ պատասխանատվությամբ ու հոգածությամբ նախաձեռնել է այդ կառույցների վերակառուցման աշխատանքներր՝ մինչ շինարարության սկիզբը տարիներ շարունակ տարբեր ձևաչափերով քննարկելով այս նախագծի կազմակերպման հնարավոր լավագույն տարբերակները շահառուների հետ:
«Փրոփերթի Դիվելոփմենթ Քամփնի» ՓԲԸ տնօրեն Արտաշես Կազախեցյանն ասաց. «Համալիրի կառուցման նախագիծը նախաձեռնել ենք դեռևս 5 տարի առաջ: Մենք ուսումնասիրել ենք տվյալ տարածքի պատմական նշանակություն ունեցող կառույցների ողջ պատմությունն ամենայն մանրամասնությամբ, կառույցների փաստացի վիճակր և պահպանման լավագույն հնարավորությունները: Այդ նպատակով կազմակերպել ենք ճարտարապետական հայեցակարգի մշակման մրցույթ՝ ներգրավելով տարբեր երկրների լավագույն մասնագետներին, հրավիրել ենք բազմաթիվ լսումներ՝ փորձագետների և շահագրգիռ անձանց մասնակցությամբ: Մեր սկզբունքն է՝ լինել առավելագույնս թափանցիկ և պահպանելով հինը՝ կերտել նորը: Առաջնորդվելով նման կարգախոսով՝ մշակել ենք յուրաքանչյուր քարի պահպանման, ընդհանուր տարածքի ճարտարապետական ոգուն համահունչ համալիրի կառուցման նախագիծ, որը նաև կհամապատասխանի «կանաչ» կառույցի շինարարական աշխատանքների ամենաժամանակակից ու բարձրակարգ չափանիշներին»:
Համալիրի ընդհանուր արժեքը շուրջ 37 մլն ԱՄՆ դոլար է: Համաշխարհային բանկի անդամ Միջազգային ֆինանսական կորպորացիան (International Finance Corporation, IFC) տրամադրել է 9 մլն ԱՄՆ դոլարի վարկ, ինչպես նաև ներգրավվել է ևս 9 մլն ԱՄՆ դոլարի վարկ DEG (Deutsche Investitions und Entwicklungsgesellschaft mbH) միջազգային կառույցից: Նախագծի ֆինանսավորման մնացած գումարն ապահովելու է «Փրոփերթի Դիվելոփմենթ Քամփնի» ՓԲԸ-ն՝ իր միջոցների հաշվին:
IFC ներդրումային ծրագրերի ավագ համակարգող Արման Բարխուդարյանը նշեց. «Ժամանակակից բիզնես-կենտրոնների աճը խթանում է տնտեսական զործունեությունը, ինչպես նաև բարձրացնում տեղական միկրո, փոքր և միջին ձեռնարկատերերի աշխատանքի արդյունավետությունը: Հայաստանում բիզնեսի գործունեության ենթակառուցվածքային
հզորացումը և «կանաչ» տեխնոլոգիաների զարգացումը ապագայում կնպաստեն և օրինակ կծառայեն Հայաստանում էներգախնայող շինարարական ծրագրերի երկարաժամկետ զարգացմանը»:
«DEG-ն հպարտ է, որ մասնակցում է այս նորարարական նախագծին: Այն օրինակելի նախագիծ է, քանի որ հաշվի է առնում Հայաստանի մշակութային ժառանգության պահպանման նշանակությունր և միաժամանակ էներգախնայողության տեխնոլոգիաների կիրառման շնորհիվ հիմք է դնում տարածաշրջանում շինարարական նոր ստանդարտների ներդրմանը: Այն նաև ստեղծում է նոր աշխատատեղեր և բիզնեսի զարգացման նոր հնարավորություններ»,- ասաց DEG Եվրոպայի, Մերձավոր Արևելքի և Կենտրոնական Ասիայի երկրների տնօրեն դոկտոր Փիթեր Թիմմեն:
«Կամար» բիզնես-կենտրոնի շինարարական աշխատանքները նախատեսվում է ավարտել մինչև 2016թ. նոյեմբեր ամիսը: Համալիրում գործունեություն են ծավալելու հիմնականում ֆինանսական, խորհրդատվական ընկերություններ և միջազգային կառույցներ:
