Սիրիայի նախագահ Բաշար Ասադը հունվարի 6-ին հանդես է եկել երկրի և տրածաշրջանի իրավիճակի մասին ուղերձով։ Ուղիղ հեռարձակումն իրականացրել է Al Jazeera-ն։
Ասադի խոսքերով՝ Սիրիան խոշորածավալ պատերազմ է վարում արտասահմանցի ահաբեկիչների դեմ, որոնց աջակցում են «որոշ» սիրիացիներ, և այդ հանգամանքն անհնարին է դարձնում նրանց հետ երկխոսությունները։
Ասադը հայտարարել է, որ «ահաբեկիչները» գործում են արտերկրի ցուցումներով, ուստի հակամարտության կարգավորման համար պետք է պայմանավորվել «ահաբեկիչների տերերի», այսինքն՝ արևմտյան և Պարսից ծոցի արաբական երկրների հետ, և ոչ թե՝ վերջիններիս «ստրուկների»։
Սիրիայի նախագահը նաև նշել է, որ այդ երկխոսությունն ամենևին էլ չի նշանակում ընդդիմության հետ զինված հակամարտության ավարտի հաստատում։ Ըստ նրա՝ ընդդիմադիրները «ծախել են երկիրը», և դա է պատճառը, որ «հաղթանակն անհնարին է»։ Նախագահը գովաբանել է բանակին «ահաբեկչության դեմ հերոսական պայքար մղելու համար»։
Բաշար Ասադը հայտարարել է, որ երկրում կանցկացվեն քաղաքական բարեփոխումներ, կհայտարարվի համընդհանուր համաներում, որից հետո կգրվի «ազգային հրովարտակ» (սահմանադրություն)։ Այն կդրվի համաժողովրդական հանրաքվեի, ինչպես նաև կանցկացվեն ազատ ընտրություններ։ Նրա խոսքերով՝ միայն սիրիացիներն իրենց երկրի բախտը որոշելու իրավունք ունեն։
Ասադը քննադատել է իր հակառակորդներին՝ իրենք իրենց «հեղափոխականներ» կոչելու համար։ Ըստ Ասադի՝ հեղափոխությունը դրական երևույթ է՝ ուղղված երկիրը զարգացնելուն, որը պետք է ունենա գաղափարական հենք և առաջնորդ-մտածողներ։ Սակայն ներկայիս ընդդիմադիրները, Ասադի կարծիքով, ոչ մի ընդհանուր բան չունեն հեղափոխության հետ, և ընդամենը «հանցագործների հրոսակախմբեր» են։
Սիրիայի նախագահը խոստացել է, որ իրենք շարունակելու են պայքարն Իսրայելի դեմ, որ Պաղեստինը և Գոլանի բարձունքները չեն մոռացվել։ Նա նաև դատապարտել է ՀԱՄԱՍ-ի կեցվածքը, որը չի աջակցել սիրիական կառավարությանը և լքել է երկիրը։ Ըստ Ասադի՝ չեն ողջունվում «ոմանք», որոնց համար Սիրիան միան «հյուրանոց» է, և նույն այդ «ոմանք» ծանր պահերին թողնում և լքում են երկիրը։
Ելույթը կայացել է Դամասկոսի օպերային թատրոնում, տևել է 55 րոպե և ուղեկցվել է բուռն ծափահարություններով, խանդավառ վանկարկումներով և աջակցության բացականչություններով։
Ընդդիմությունը բազմիցս առաջարկել է Ասադին հակամարտության կարգավորման տարբերակներ՝ գլխավոր պայման դնելով Ասադի հրաժարականը և երկրից հեռանալը։ Սակայն Սիրիայի նախագահը կտրականապես մերժում է այն և հայտարարում, որ «կապրի և կմեռնի հայրենիքում»։