2013 թվականը Ֆրանսիայում սկսվել է հերթական քաղաքական և ֆինանսական սկանդալով` կապված նախկին նախագահ Նիկոլա Սարկոզիի հետ: Լիբանանցի գործարար Զիադ Թաքիեդին հաստատել է, որ Մուամար Քադաֆիի վարչակարգը ֆինանսավորել է Ֆրանսիայի նախկին նախագահ Նիկոլա Սարկոզիի նախընտրական քարոզարշավը: Նա իր ցուցմունքը հաստատել է Le Parisien-ին տված հարցազրույցում:
Գործարարը պարտավոր է դատարանում ներկայացնել փաստաթղթեր, որոնք վկայում են, որ Լիբիայի նախկին առաջնորդը 2006-2007թթ. գումար է հատկացրել Սարկոզիի նախընտրական քարոզարշավի համար: Ընդհանուր առմամբ Քադաֆին հատկացրել է ավելի քան 50 միլիոն եվրո:
Թաքիեդինը պատմել է նաև 2006-2007թթ. տեղի ունեցած մի քանի հանդիպումների մասին, որոնք տեղի են ունեցել Քադաֆիի խորհրդական Բաշիր Սալեհի և Ելիսեյան պալատի քարտուղար Կլոդ Գեանի միջև: Սալեհը Տրիպոլիին գրավոր զեկուցել է այս հանդիպումների մասին: Այժմ նրա հաշվետվությունը գտնվում է Լիբիայի նախկին վարչապետ Բաղդադի Ալ-Մահմուդի մոտ, որը վերջերս Ֆրանսիայից արտաքսվել է Լիբիա:
Լիբանանցի գործարարը խոսել է նաև լիբիական կառավարության և ֆրանսիական երեք ընկերությունների միջև կնքված կեղծ պայմանագրերի մասին: Թաքիեդինի խոսքերով` գործարքի ընդհանուր արժեքը կազմում է ավելի քան 100 միլիոն եվրո:
Տեղեկատվությունն այն մասին, որ Սարկոզին գումար է ստացել Քադաֆիից, հայտնվել է դեռևս 2011թ. մարտին: Այդ մասին առաջինը հայտարարել է Քադաֆիի որդին` Սեյֆ Ալ-Իսլամը, որի խոսքերով` Սարկոզին իր ընտանիքից ստացել է 50 միլիոն եվրո: Սարկոզին հերքում է մեղադրանքները:
