Օդի ուժեղ աղտոտվածության պատճառով Իրանի կառավարությունը մայրաքաղաք Թեհրանում հերթական հանգստյան օրն է հայտարարել։ Այս մասին տեղեկացնում է IRNA-ն՝ հղում կատարելով Իրանի փոխնախագահին և Շրջակա միջավայրի պաշտպանության կազմակերպության ղեկավար՝ Մուհամմադ Ջավադ-Մուհամմադիզադեին:
Մուհամմադիզադեի խոսքերով՝ Թեհրանում վաղը փակ կլինեն դպրոցները, մանկապարտեզները, բուհերը, ինչպես նաև՝ կսահմանափակվի երթևեկությունը:
Բացի դրանից, Իրանի Պրեմիեր-լիգայի խաղերը, որոնք պետք է տեղի ունենային Թեհրանում ուրբաթ և շաբաթ օրերին, հետաձգվել են, որպեսզի սպառնալիքի տակ չդրվի խաղացողների առողջությունը:
Միայն անցած ամիս օդի չափազանց աղտոտվածության պատճառով Իրանում ստիպված են եղել երկու անգամ հանգստյան օր հայտարարել:
Թեհրանը համարվում է աշխարհր ամենաաղտոտված քաղաքներից մեկը: Աշխատանքային օրերին քաղաքի բնակչության թիվը հասնում է 15 միլիոնի, որը խցանումներ և քաղաքի կենտրոնում օդի ուժեղ աղտոտվածություն է առաջացնում:
Ավելի վաղ Իրանի խորհրդարանի ներկայացուցիչը հայտարարել էր, որ Իրանը ամեն հանգստյան օրվա համար 65 միլիոն դոլար է կորցնում:
Հոկտեմբեր ամսին Թեհրանում Օդի որակի կառավարման կենտրոնի գլխավոր տնօրեն Յուսիֆ Ռաշիդին տեղեկացրել է, որ ամեն տարի օդի աղտոտվածության պատճառով 4-5 հազար մարդ է մահանում:
Որոշ փորձագետներ գտնում են, որ Թեհրանի օդի աղտոտվածության հիմնական պատճառ են հանդիսանում երկրում արտադրվող և էկոլոգիական ստանդարտներին չհամապատասխանող ավտոմեքենաները, և կոչ են անում կրճատել այդ մեքենաների արտադրությունը:
Իրանը ավելի վաղ այդ խնդրի լուծման նպատակով մի շարք օրենքների էր ընդունել, սակայն դրանցից ոչ մեկը չեն աշխատել:
