Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ սկսվում է Լիանա Մկրտչյանի գործի դատական քննությունը:
Ըստ մեղադրանքի՝ Խաչատուր Աբովյանի անվան մանկավարժական համալսարանի հիմա արդեն նախկին հաշվապահ Լիանա Մկրտչյանը աշխատելու ժամանակահատվածում իր տրամադրության տակ ունենալով 2011 թվականի հոկտեմբերի 26-ին աշխատանքից ազատված Ռ. Մ.- աշխատավարձի բանկային քարտը, 2011 թվականի նոյեմբերից մինչև 2013 թվականի դեկտեմբերի 24-ը Ռ. Մ.-ի տվյալները նշել է համալսարանի քարտային հաշիվների համալրման հանձնարարագրերում:
Ռ. Մ.-ի հաշվեհամարին ամեն ամիս աշխատավարձ է փոխանցվել, իսկ հաշվապահը տարբեր բանկոմատներից կանխիկացրել ու յուրացման եղանակով հափշտակել է ընդհանուրը՝ 8 միլիոն 180 հազար դրամ:
Լիանա Մկրտչյանը մեղադրվում է ՀՀ քրեական օրենսգրքի 179 հոդվածի 1-ին մասով: Նրա խափանման միջոցը ստորագրությունն է չհեռանալու մասին:
