CNN Türk-ի փոխանցմամբ, Թուրքիայի Դատավորների ու դատախազների բարձրագույն խորհրդի (HSYK) որոշմամբ իրենց զբաղեցրած պաշտոններից ազատվել և նոր պաշտոններ են ստացել միանգամից 128 դատախազներ ու դատավորներ:
Ամենաուշագրավը, սակայն, այն է, որ դա վերաբերել է նաև ահաբեկչական «Էրգենեքոն» կազմակերպությանը գործը վարող դատախազներին` Զեքերիա Օզին, Ֆիքրեթ Սեչենին ու Էրջան Շաֆաքին: Այս եռյակը նոր պաշտոններ է ստացել Ստամբուլի դատախազությունում:
«Էրգենեքոն»-ի գործով արդեն նախկին գլխավոր մեղադրող Զեքերիա Օզը, ով այլևս կապ չի ունենալու այդ գործի հետ, լրատվամիջոցներին տված հարցազրույցի ժամանակ հայտարարել է, որ իր համար բավականին անսպասելի է եղել իր զբաղեցրած պաշտոնից հեռացվելը:
Հիշեցնենք, որ Զեքերիա Օզը «Էրգենեքոն»-ի դատավարության գործում ներգրավված է 2007 թվականի հունիսի 12-ից, երբ Ստամբուլի Ումրանիե թաղում իրականացված գործողության հետևանքով ձերբակալվեց 21 մարդ, որոնցից 15-ը` «ահաբեկչական զինված կազմակերպություն ստեղծելու» մեղադրանքով:
Ինչ վերաբերում է այս փոխատեղումներին, ապա, ամենայն հավանականությամբ, վարչապետ Էրդողանին արդեն սկսել է ձանձրացնել շուրջ 4 տարի ընթացող այդ դատավարությունը և նոր փոխատեղումները կարագացնեն այդ գործընթացը: