ԴԱԻՇ («Իրաքի և Շամի իսլամական պետություն») արմատական խմբավորման գրոհայինները չորեքշաբթի օրը գերությունից ազատ են արձակել 25 քուրդ դպրոցականներին, որոնք ավելի վաղ պահվել են որպես պատանդներ: Այս մասին գրում է Ria Novosti-ն՝ վկայակոչելով մարդու իրավունքների մոնիթորինգի սիրիական կենտրոնին:
Քոբանի քաղաքի (Այն էլ-Արաբ) դպրոցներից մեկի մոտ 145 աշակերտները ծայրահեղականների կողմից առևանգվել էին այս տարվա մայիսի 29-ին՝ ամենամյա քննություններից հետո տուն վերադառնալիս: Այդ օրվանից նրանց մասին ոչինչ չէր հաղորդվում:
Իրավապաշտպանների խոսքով՝ սա դպրոցականների վերջին խումբն էր, որ որպես պատանդ պահում էին գրոհայինները: Իսկ թե ինչ պայմաններում է տեղի ունեցել նրանց ազատումը՝ հայտնի չէ: Երեխաների վիճակի մասին ևս ոչինչ չի հաղորդվում:
