Թուրքական Cumhuriyet թերթի փոխանցմամբ, Թուրքիայի Ազգային մեծ ժողովի (ԹԱՄԺ) խոսնակ Մեհմեդ Ալի Շահինը հանդիպում է ունեցել Ֆրանսիայի Սենատի ԵՄ-ի գծով հանձնաժողովի նախագահ Ջին Բիզեթի հետ:
Հանդիպման ժամանակ կողմերը քննարկել են թուրք-ֆրանսիական քաղաքական, տնտեսական, պատմական ու մշակութային հարաբերությունները, ինչպես նաև անդրադարձ կատարել Հայոց ցեղասպանության խնդրին:
Շահինը հայտարարել է. «Մեզ համար Հայկական հարցը փակված է: Ցեղասպանության մասին հայերի պնդումները գիտական քննարկման առարկա են: Այն, որ հայերի հիշողության մեջ դեռ մնացել են դրանք, դեռ ապացույց չէ: Պետք է լուրջ և անկողմնակալ գիտական աշխատանք իրականացնել «ճշմարտությունը» պարզելու համար: Այդ խնդիրը չի վերաբերում խորհրդարաններին:
Իհարկե, նախկինում գրանցվել են ցավալի իրադարձություններ, որոնցից տուժել են հայերը, թուրքերը և մյուս ազգերը: Սակայն դա գիտական շրջանակների քննարկման առարկան է:
1.5 տարի առաջ Ցյուրիխում ստորագրված հայ-թուրքական արձանագրություններով նախատեսվում էր ստեղծել պատմաբանների հանձնաժողով, որն էլ կուսումնասիրի վիճելի հարցերը»:
