Ղրիմից Հայաստան թռիչքներ չեն կարող իրականացվել՝ առանց Կիևի թույլտվության. «Առաջին լրատվական»-ի հետ զրույցում այս մասին ասաց ՀՀ-ում Ուկրաինայի արտակարգ և լիազոր դեսպան Իվան Կուխտան՝ անդրադառնալով Սիմֆերոպոլ-Երևան-Սիմֆերոպոլ ավիահաղորդակցության հնարավոր բացմանը:
Նա նշեց, որ մամուլում հայտնված տեղեկություններն այդ ավիահաղորդակցության բացման մասին չեն հաստատվում, քանի որ կա պաշտոնական դիրքորոշում ՀՀ իշխանությունների կողմից, որն իր համար հնչեցրել են: Նրա համոզմամբ՝ Երևանը չի տվել նման համաձայնություն:
«Նման թռիչքներ չեն կարող լինել, քանի որ եթե լինեին, ապա հայկական կողմը սրա համար թույլտվություն պետք է խնդրեր ուկրաինական կողմից: Ինչպե՞ս կարող են լինել նման թռիչքներ, եթե ՀՀ իշխանությունները դրա համար պաշտոնական թույլտվություն չեն տվել: Ես կարծում եմ, որ սա սադրանք է, տեղեկատվական սադրանք է, քանի որ կան միջազգային կազմակերպություններ, ինչպես ԻԿԱՕ-ն, որոնք Ղրիմը չեն դիտարկում որպես ՌԴ տարածքի մի մաս: Ուստի բոլոր թռիչքները, որոնք պետք է իրականացվեն դեպի Ղրիմ, պետք է Ուկրաինայի հետ համաձայնեցվեն»,- ասաց Իվան Կուխտան:
Խոսելով հայ-ուկրաինական հարաբերությունների մասին, երբ Հայաստանը միանում է ԵՏՄ-ին, իսկ Ուկրաինան՝ ԱՀ-ին, նա ասաց, որ հայ-ուկրաինական հարաբերությունները զարգանալու են՝ չնայած նրան, որ Հայաստանը 2015 թ. հունվարի 1-ից կմիանա ԵՏՄ-ին, իսկ Ուկրաինան ստորագրել է ԱՀ-ն: «Սրանք չեն խոչընդոտում հայ-ուկրաինական հարաբերություններին, քանի որ կողմերը հետաքրքրված են հարաբերությունների զարգացմամբ: Ընդհակառակը, ես կարծում եմ, որ այս փաստն էլ ավելի կուժեղացնի մեր հարաբերությունները: Ուկրաինան ընչունում է Հայաստանի ընտրությունը»,- ասաց դեսպանը:
Անդրադառնալով Ուկրաինայի Գերագույն ռադայի ընտրություններին և ընտրություններում պրոեվրոպական թևի հաղթանակին՝ դեսպանն ասաց, թե Ուկրաինայի համար հաճելի է, որ Հայաստանի տարածքում՝ Երևանում, ընտրատեղամաս է եղել, Ուկրաինայի քաղաքացիները, որոնք բնակվում են Հայաստանում, եկել են քվեարկելու, իրենց ձայնը տվել են «Պյոտր Պորոշենկոյի դաշինք»-ի օգտին, ապա վարչապետի կուսակցության «Ազգային ճակատ»-ի, որը ևս մեկ անգամ փաստում է այն մասին, որ Ուկրաինայի այն քաղաքացիները, որոնք ապրում են Հայաստանում, իրականացրել են իրենց ընտրությունը և հաստատել այն ծրագիրը, որը հնչեցրել են վարչապետն ու նախագահը: «Այս երկու կուսակցությունները հաղթող են, ինչը ևս մեկ անգամ փաստում է, որ Ուկրաինան ընտրել է զարգացման եվրոպական ուղին»,- ասաց դեսպանը:
Լուսանկարը՝ Armenpress-ի