Բրիտանական Time ամսագրի համաձայն՝ ամենատարածված «վիրուսային» նորությունների ուսումնասիրությունը շատ բան է ասում ժամանակակից հասարակության կարիքների և հետաքրքրությունների մասին:
Թխվածքալիթ արտադրող ամերիկյան Oreo ընկերությունը 2012թ. հունիսին սկանդալ հրահրեց ԱՄՆ-ում` Facebook-ի իր էջում հրապարակելով բազմագույն կրեմով թխվածքաբլիթի լուսանկար ավանդական սպիտակ գույնի կրեմի փոխարեն: Այս կերպ ընկերության սեփականատերերը ցանկացել էին նշել Նյու Յորքում միասեռ ամուսնությունների օրինականացման տարելիցը:
Լիբերալները հիացան Oreo-ի այս քայլով, իսկ պահպանողականներին շատ զայրացրեց դա: Հազարավոր մարդիկ դիմում էին ստորագրում` պահանջելով բոյկոտել Oreo-ի դուստր ընկերությանը` Nabisco-ին: Նույնքան մարդ դիմում էր ընկերությանը` խնդրելով շարունակել թողարկել գույնզգույն թխվածքաբլիթ:
Տարեց իսպանուհու պատմությունը, որը սեփական նախաձեռնությամբ «վերականգնել» էր կաթոլիկական հնագույն որմնանկարը` Հիսուսի պատկերը վերածելով մազոտ կապիկի նկարի, մի քանի օրում տարածվեց աշխարհով մեկ: Ամբողջ աշխարհի ինտերնետ օգտատերերը սկսեցին նոր անուններ հորինել արվեստի «վերածնված» ստեղծագործության համար:
Որքան էլ տարօրինակ է, սակայն այս պատմությունը նաև դրական կողմ ունեցավ. զբոսաշրջիկները, որոնք ցանկանում էին սեփական աչքերով տեսնել «հրեշին», այցելում էին Իսպանիայի Բորհա քաղաք, որը նախկինում այնքան էլ հայտնի չէր:
Գարնան վերջում ԱՄՆ-ում բռնկվեց կանիբալիզմի համաճարակ: Ամեն ինչ սկսվեց 2012թ. մայիսին Մայամիում, որտեղ ոստիկանները գնդակահարել էին մերկ մարդու, որը հասարակական վայրում օրը ցերեկով կրծել էր անտուն մարդու դեմքը: Ավելի ուշ կանիբալիզմի նման դեպքեր գրանցվեցին նաև այլ նահանգներում:
Ոստիկանության նախնական տարբերակի համաձայն` մարդկային մարմնի սիրահարները թմրանյութի ազդեցության տակ են եղել, սակայն հետագա անալիզները ցույց են տվել, որ դա այդպես չէ:
«Մոխրագույնի 50 երանգները» էրոտիկ տրիլոգիան, որը պատմում է երիտասարդ աղջկա և սադոմազոխիզմով տառապող միլիարդատիրոջ հարաբերությունների մասին, այնքան հայտնի դարձավ, որ նորածին երեխաներին նույնիսկ սկսել են անվանակոչել գրքի հերոսների անուններով:
Հարավկորեացի 34-ամյա ռեփեր Psy-ի տեսահոլովակը դարձել է աշխարհի ամենահայտնի տեսահոլովակը YouTube վիդեոհոսթինգի պատմության ամբողջ ընթացքում: Ռեփեր Psy-ի պարային շարժումները հայտնի են դարձել ոչ միայն համացանցում, այլև դրա սահմաններից դուրս:
