Այսօր Հովիկ Աբրահամյանն Ազգային ժողովում ներկայացրեց իր կառավարության առաջին բյուջեն՝ 2015թ. բյուջեի նախագիծը։ Եվ այսօրվանից ԱԺ մշտական հանձնաժողովներում սկսվում են այդ օրինագծի քննարկումները։ Մշտական հանձնաժողովներից հետո այն քննարկվելու է նաև ԱԺ լիագումար նիստերում և ընդունվելու է տարեվերջին: Այսօրվանից, սակայն, արդեն նկատելի է, որ այս տարի բյուջետային քննարկումները թեժ չեն լինելու։
Առավոտյան, երբ Հ.Աբրահամյանը ներկայացրեց բյուջեն ու գնաց, նրա հետևից հեռացան դահլիճում ներկա մի քանի պատգամավորները, և զեկուցող՝ ֆինանսների փոխնախարար Պավել Սաֆարյանին ընդամենը մի քանի հարց տրվեց։ Ու եթե չլիներ Խոսրով Հարություննյանը՝ իր մի քանի հարցով, բյուջետային քննարկումների առաջին օրը կարելի էր տապալված համարել։ Այն առանց այդ էլ բավական կարճ տևեց, և մինչև երկրորդ մասի սկսելը մի քանի ժամ ընդմիջում եղավ։
Դժվար է ասել, թե հանրապետականներն ինչու չէին մասնակցում այդ քննարկումներին։ Առավել զարմանալի էր հատկապես ոչիշխանական ուժերի բացակայությունը այն պարագայում, երբ նախորդ տարիներին նրանք ակտիվորեն քննադատում էին նախկին վարչապետ Տիգրան Սարգսյանի ներկայացրած բյուջեի նախագծերը։ Գուցե այս անգամ խնդիրն անձն է, և շատերը չեն ցսնկանում քննադատել Հ.Աբրահամյանի բյուջեն։
Իսկ այս տարվա բյուջեն բավականին աղքատիկ է։ Նախորդ տարվա համեմատ այս տարի նախատեսված է ընդամենը 34 մլրդ դրամով ավելի հարկեր ու տուրքեր հավաքել։ Մինչդեռ 2014թ. նախատեսված էր 2013-ի համեմատ 100 մլրդ դրամով ավել հարկեր հավաքել։ Հարկեր/ՀՆԱ հարաբերակցությունն էլ պահված է 2014թ. Մակարդակին, և գոնե 0,3 կամ 0,4 տոկոսի աճ չի նախատեսվում։
Ահա այս և բյուջեի հետ կապված այլ խնդիրների մասին փորձեցինք զրուցել ֆինանսների նախարար Գագիկ Խաչատրյանի հետ։ Վերջինս բավական հմտորեն խույս տվեց լրագրողներից։ Նա նախ քննարկումների դահլիճից դուրս եկավ հետնամուտքից, այն մուտքից, որտեղից ներսուդուրս է անում ԱԺ նախագահը: Ենթադրվում էր, որ նա ԱԺ նախագահ Գալուստ Սահակյանի մոտ էր, քանի որ նրա զրահապատ մեքենան սպասում էր տիրոջը ԱԺ բակում՝ այն մուտքի մոտ, որտեղից ելումուտ է անում Գ.Սահակյանը:
Լրագրողները փորձեցին այնտեղ հանդիպել Գ.խաչատրյանին ու ստանալ իրենց հուզող հարցերի պատասխանը, բայց նրա մեքենան հանկարծ արագ դուրս եկավ ԱԺ բակից ու միաժամանակ շենքի մեկ այլ մուտքից նույն ուղղությամբ սլացավ ևս մի մեքենա՝ ուղեկցող մեքենայի հետ։
Փաստորեն, լրագրողների մի քանի հարցից խուսափելու համար Հայաստանի թիվ մեկ պաշտոնյաներից մեկը՝ հարկային-մաքսային ու ֆինանսների բաշխման ոլորտի ղեկավարը, նման հնարքների է դիմում։ Եվ նրան ուղղված հարցերը բաժին ընկան ֆինանսների փոխնախարար Պավել Սաֆարյանին։
