Կրթության և գիտության նախարար Արմեն Աշոտյանը լրագրողներին տեղեկացրեց, որ Վրաստան իր այցելության նպատակներից մեկն էր նաև «Ժողովրդավարությունը սկսվում է քեզանից» հարավկովկասյան աշակերտական խորհրդարանի մեկնարկի ծրագրին մասնակցելը: Այս ծրագրի նպատակն է Հայաստանի, Վրաստանի և Ադրբեջանի աշակերտների շրջանում խրախուսել քաղաքացիական և ժողովրդավարական ընկալումները:
Աշոտյանը նշեց, որ Հայաստանի մասնակցությունն այս ծրագրին եղել է շատ ակտիվ, ընտրվել են շատ փայլուն երեխաներ, իսկ ադրբեջանական կողմը ո՛չ նախարարի, ո՛չ էլ աշակերտների մակարդակով չի մասնակցել ծրագրին:
«Անթույլատրելի է մեծ քաղաքականության մեջ փոքր երեխաների շահագործումը, անթույլատրելի է երիտասարդ սերնդի մոտ ձևավորել հայատյացության և ատելության ֆենոմենը, անթույլատրելի է, երբ աշակերտները քաղաքական խաղերի մեջ գործիք են դառնում»,- ընդգծեց Աշոտյանը և հավելեց, որ ադրբեջանական կողմը մասնակցությունը մերժելու նամակում գրել է, թե «իրենց երեխաները չեն նստի օկուպանտների երեխաների կողքին»:
Աշոտյանը նաև տեղեկացրեց, որ Վրաստան իր այցելության ժամանակ պայմանավորվածություն է ձեռք բերվել Վրաստանում գործող հայկական դպրոցներում հայոց լեզվի դասաժամերը դարձնել 7-8 ժամ: Նշենք, որ մինչ 2010թ. դասաժամերը հենց այդքան էին, սակայն 2010-ին կրճատվել էին` դառնալով 5 ժամ:
Աշոտյանն իր վրաց գործընկերոջ հետ նաև ստորագրել է հուշագիր, որով կյանքի է կոչվելու Սերժ Սարգսյանի և Միխեիլ Սաակաշվիլիի միջև ձեռք բերված համաձայնությունը՝ նախագահական կրթաթոշակների ծրագիրը երկու երկրների ուսանողների համար:
Աշոտյանի խոսքերով, տասական կրթաթոշակ կտրամադրվի Վրաստանի և Հայաստանի ուսանողներին, ինչն էլ հնարավորություն կտա այս տարվանից արդեն հայ և վրացի ուսանողներին սովորելու հայկական բուհերում և դա, կրթականից բացի, ունի նաև քաղաքական նպատակ:
