Բյուջետային ծախսերում ատկանտների վերացումը կամ կրճատումը կարող է տեղի ունենալ ծրագրային բյուջետավորման ներդրումից հետո: Այս մասին այսօր Ազգային ժողովի մշտական հանձնաժողովներում 2015-ի բյուջեի նախագծի նախնական քննարկումների ժամանակ հայտարարեց ֆինանսների փոխնախարար Պավել Սաֆարյանը՝ պատասխանելով ՀՀԿ խմբակցության պատգամավոր Սամվել Ֆարմանյանի հարցին, թե ի՞նչ նոր քայլեր, մեխանիզմներ են ձեռնարկվել, որոնք կարող են ապացուցել, որ բյուջետային ծախսերը կլինեն նպատակային և հնարավորինս մինիմալիզացված՝ ատկատների զսպման առումով:
«Բյուջետային տեսակետից ատկատների վերացման ճանապարհը ծրագրային բյուջետավորման ներդրումն է: Այսինքն՝ երբ բյուջեն կլինի ամբողջապես ծրագրային, երբ կունենանք արդյունքների հիման վրա ծախսեր, ծրագրեր՝ իրենց որակական, քանակական, ժամկետային չափանիշներով, այդ ժամանակ ատկատների տեսակարար կշիռը կնվազի: Մենք այս ուղղությամբ աշխատանքներ տանում ենք, մենք ԱԺ-ում ենք քննարկումներ արել այս թեմայով»,-ասել է ֆինանսների փոխնախարարը:
Անդրադառնալով Հայոց ցեղասպանության 100-րդ տարելիցի միջոցառումների համար որքան գումար է նախատեսված եկող տարվա բյուջեում հարցին՝ Պավել Սաֆարյանը պատասխանեց. «Ստեղծվել է Ցեղասպանության 100-րդ տարելիցի հանձնաժողով, ընդգրկված է նաև հանրապետության նախագահը, աշխատանքները գրեթե ավարտված են, ծրագրերն ամփոփելուց հետո դրանք նոր կունենան ֆինանսավորում: Մենք այդ գումարները կհատկացնենք պահուստային ֆոնդից»:
Հարցին, թե արդյոք 2015-ին նոր դեսպանություններ բացվելո՞ւ են, և արդյոք 2015-ին միջոցներ կհատկացվե՞ն Իրաքում և Դանիայում մեր դեսպանությունների տարածքի վարձակալման համար, քանի որ բարեգործները հրաժարվել են ֆինանսավորել Դանիայի և Իրաքի դեսպանություններին, ֆինանսների փոխնախարարն արձագանքեց. «Ես չեմ այն մարդը, ով պետք է ասի: Ես անգամ չգիտեմ՝ ով էր ֆինանսավորում: Կարծում եմ՝ ԱԳՆ-ն ձեզ մանրամասն կներկայացնի պատճառները»:
