ԱԺ սոցիալական հարցերի մշտական հանձնաժողովի կողմից «Ժամանակավոր անաշխատունակության նպաստների մասին» ՀՀ օրենքում լրացումներ և փոփոխություններ կատարելու մասին», «Պետական նպաստների մասին» ՀՀ օրենքում փոփոխություններ կատարելու մասին», «Եկամտային հարկի մասին» ՀՀ օրենքում փոփոխություն կատարելու մասին» օրենսդրական փաթեթը քննարկելու նպատակով այս պահին խորհրդարանական լսումներ են ընթանում:
Աշխատանքի և սոցիալական հարցերի նախարարության սոցիալական ապահովության պետական ծառայության պետի առաջին տեղակալ Սմբատ Սաիյանը ներկայացրեց օրենքում կատարված փոփոխությունները:
ԱԺ ՕԵԿ-ական պատգամավոր Հեղինե Բիշարյանը մտահոգություն հայտնեց օրինագծի վերաբերյալ: Մասնավորապես, որ նախատեսվում է արձակուրդային հաշվարկները կատարել ըստ տոկոսների՝ 40, 60 80 տոկոս: 100 տոկոսից նման անցում կատարելը, ըստ Հեղինե Բիշարյանի, լուրջ խնդիր է, քանի որ չի կարելի է տարանջատել անձի նախկին աշխատատեղի ստաժը վերջին աշխատատեղից, երկրորդ՝ մինչև մեկ տարի հաշվարկել 40 տոկոս: Ըստ նրա՝ զավեշալի տոկոս է, երբ մենք սոցիալական երկիր ենք, ունենք ժողովրդագրական խնդիր, և այդ ֆոնի վրա անել մի բան, որ երիտասարդ ընտանիքները հեռու մնան երեխաներ ունենալուց:
Ս.Սաիյանը նշեց, որ սա նախագիծ է, որ դրվել է քննարկման, և տոկոսների համար, որոնք սահմանվել են, հիմք է հանդիսացել միջազգային փորձը:
Հեղինե Բիշարյանը հետարքրքվեց, թե որ երկրների փորձն են հաշվի առել:
«Նույնիսկ խորհրդային ժամանակահատվածում 40 տոկոս կրառվում էր աշխատանքային քիչ ստաժ ունենալու դեպքում: Այդ մոտեցումը կիրառվում է հետխորհրդային երկրներում՝ Մոլդովա և այլն»,- ասաց Սմբատ Սաիյանը: Նա նաև նշեց, որ Լիտվայում գործում է այս մոտեցումը:
«Որևէ եվրոպական փաստաթուղթ պետության համար ուղղակի պարտավորություն չի սահմանում՝ 100 տոկոս փոխհատուցել հղիության ժամանակահատվածի համար»,- ասաց նա:
Աշխատանքի և սոցիալական հարցերի նախարար Արտեմ Ասատրյանը նշեց, թե որն է նպատակը, ինչ խնդիրներ են ուզում լուծել:
«Մենք ունենք հղիության, ծննդաբերության նպաստ, ծննդյան միանվագ նպաստ, խնամքի նպաստ, մինչև երկու տարեկան երեխա խնամող մայրերի համար ամսական 18000 դրամի չափով: Ծախսերն աճել են շուրջ երեք անգամ: «Արդյոք դրանք իրենց նպատակի՞ն են ծառայում, արդյոք այդ ծրագրերի հիմքում դրված նպատակնե՞րն են բերել ծախսերի ավելացման: Եթե մենք պարզեինք, որ այդ ծախսերը բոլորը օբյեկտիվ գործոնով են պայմանավորված, որ դրանք ավելացնում են ծնելիությունը և խրախուսում են, հավատացած եղեք, որ կառավարությունը, ՀՀԿ-ն կգտնեին միջոցներ, որ ավելացնեինք նաև այս ծախսերը»,- ասաց նախարարը:
Նա նշեց, որ առաջին հերթին այս խնդիրները քննարկել են ՀՀԿ նիստում. այս ընթացքում 4-5 քննարկում են արել: «Մենք խնդրում ենք, որ բոլոր կողմերը խնդիրները որ ներկանացնում են, ներկայանցնեն խնդրի լուծման ճանապարհը»,- հավելեց նախարարը:
Լուսանկարը` PAN Photo-ի
