Ճապոնիայի Ֆուկուսիմա պրեֆեկտուրայում, որը լրջորեն տուժել էր տեղի ԱԷԿ-ի վթարի հետևանքով, նկատվում է մանկական ճարպակալման աճ: Ինչպես հաղորդում է Focus գերմանական պարբերականը, այս մասին վկայում է Ճապոնիայի առողջապահության նախարարության հետազոտությունը, որին մասնակցել է 5-17 տարեկան շուրջ 700 հազար դպրոցական:
Եթե նախկինում պրեֆեկտուրայում անբավարար արդյունքներ գրանցվել են միայն մեկ տարիքային խմբում՝ 10-րդ դասարանում սովորողների շրջանում, ապա այժմ պրեֆեկտուրայի փոքրիկ բնակիչները «առաջնորդում են» միանգամից յոթ տարիքային խումբ, ընդ որում, ճարպակալման ավելի շատ հակված են ցածր դասարաններում սովորող երեխաները:
Երկրի առողջապահության նախարարության ներկայացուցիչը նշել է, որ երեխաների մոտ հավելյալ քաշի պատճառը ակտիվության կրճատումն է, այդ թվում մաքուր օդում սպորտով և մարմնամարզությամբ զբաղվելը:
Ինչպես նշում է պարբերականը, «Ֆուկուսիմա-1» ԱԷԿ-ի վթարից անմիջապես հետո պրեֆեկտուրայի ուսումնական հաստատությունների կեսը ուսումնական ծրագրից հանել են մաքուր օդում ժամանակ անցկացնելը:
