Դիզայներները խորհուրդ են տալիս Ամանորի գիշերը կրել փայլփլուն, շքեղ զգեստներ, այսինքն՝ այն ամենը, ինչ փայլուն է, քանի որ 2013-ը Ջրային օձի տարի է: Ընդ որում՝ փայլուն զգեստներ կարելի է կրել ոչ միայն դեկտեմբերի 31-ի գիշերը, այլև առօրյայում:
Եկող տարի նորաձև կլինեն կանաչի բոլոր երանգները, մուգ կարմիրը, գինու բոլոր երանգները, շագանակագույնը, մուգ կապույտը: Ինչպես միշտ, 2013-ին դարձյալ նորաձև կլինի սևը. անդրադառնալով եկող տարվա նորաձևության միտումներին, գույներին ու ոճերին՝ հայտնեց «Մարինա Ֆեշն ստուդիայի» տնօրեն, դիզայներ Մարինա Ավետիսյանը:
«2013թ. ֆավորիտ է ընտրվել սև, փոքրիկ զգեստը, որը միշտ ակտուալ է: Ի վերջո` գույնը նաև հոգեվիճակ է»,- ասաց դիզայները:
Ինչպես 2012-ին, այնպես էլ եկող տարի, նորաձև կլինեն ժանյակները, կերպասը: Դիզայները կարևորեց ճիշտ ընտրված հագուստը, որը կօգնի լավ աշխատանք գտնել: Նրա խոսքով՝ ներկայում ոճերի բազմազանությունը կանանց թույլ է տալիս տարբեր ոճեր միախառնել և ավելացնելով մի քանի զարդ` ունենալ նորաձև տեսք:
Ինչ վերաբերում է գույնի, հագուստի ձևի ունեցած ազդեցությանը մարդու հոգեբանության վրա, ապա հոգեբան Սամվել Խուդոյանը նկատեց, որ գույնը հոգեբանության մեջ մեծ դեր է կատարում՝ գոյություն ունի գունային թերապիա, կան գունային հայտնի թեստեր, որոնցով ախտորոշվում է տվյալ պահին մարդու սթրեսային վիճակը: Օրինակ՝ ըստ հոգեբանի՝ ակտիվ երեխաները նախընտրում են վառ գույներ, ասենք՝ կարմիր, իսկ ինքնամփոփ երեխաները` մուգ գույներ՝ սև, մոխրագույն:
Ըստ հոգեբանի՝ գույներն ու հագուստի ոճերն ունեն նաև տարիքային ցենզ, և նայելով մարդու հագուկապին՝ կարող ենք եզրակացնել, թե ինչ կարգի մարդ է մեր դիմաց:
