Toyota ընկերությունը համաձայնել է վճարել 1.1 մլրդ դոլար դատական գործընթացի կարգավորման շրջանակներում, որը ներկայացվել է ամերիկացի ավտոարտադրողների կողմից, որոնք տուժել են այդ ընկերության ավտոմեքենաների հետկանչման հետևանքով,- չորեքշաբթի՝ դեկտեմբերի 26-ին, հաղորդել է France-Presse-ը:
Նշված գումարի մեջ մտնում է անվճար Brake Override սարքավորման տեղադրումը, ինչպես նաև դրամական վճարումները ավտովարորդներին, որոնք հրաժարվել են BOS համակարգի տեղադրումից: Նմանատիպ վճարումների հույս կարող են ունենալ նաև այն Toyota ավտոմեքենաների վարորդները, որոնք ստիպված են եղել վաճառել դրանք ավտոընկերության կողմից իր արտադրանքի հետկանչման մասին լուրը ստանալուց հետո:
Փոխհատուցման վճարումը, նշում է AFP-ը, թույլ կտա Toyota-ին խուսափել աղմկահարույց և երկարատև դատական հայցից, որը ներկայացվել է այս ընկերության ավտոմեքենաների տերերի կողմից:
Վերջին մի քանի տարիների ընթացքում Toyota-ն բազմիցս հայտարարել է իր ավտոմեքենաների մասսայական հետկանչման մասին: Ընկերության համար ամենաանհաջող շրջանը դարձել է 2009-2010 թթ.: Այն ժամանակ Toyota-ն ստիպված էր հետ կանչել ավելի քան ինը միլիոն ավտոմեքենա:
2012 թ. Toyota-ն հինգ անգամ հայտարարել է իր ավտոմեքենաների հետկանչման մասին: Հոկտեմբերին ընկերությունը հետ է կանչել 7,43 մլն ավտոմեքենա: Հետկանչման գործընթացը խոշորագույնն էր Toyota-ի պատմության ընթացքում:
