Մինչ այս Հայաստանի և ԵՄ-ի միջև եղել են միայն ընդհանուր շփումներ: «Առաջին լրատվական»-ի հետ զրույցում այս մասին ասաց ԵՄ ընդլայնման և Եվրոպական հարևանության քաղաքականության հարցերով հանձնակատար Շտեֆան Ֆյուլեի խոսնակ Պիտեր Ստանոն՝ անդրադառնալով Բրյուսելում Հայաստանի և Եվրոպական միության պատվիրակությունների միջև նոյեմբերին կայանալիք հանդիպմանը:
Նա նշեց, որ հանդիպման օրակարգի մանրամասները քննարկվում են: Սակայն, ըստ նրա, հանդիպումը կկենտրոնանա ներկայում Հայաստան-ԵՄ հարաբերությունները տարբեր կողմերից առաջ մղելու վրա, երբ Հայաստանը ստորագրել է Եվրասիական միությանը միանալու մասին պայմանագիրը, նաև այն հարցին, թե ինչպես խթանել երկկողմ հարաբերությունները՝ հաշվի առնելով Հայաստանի նոր միջազգային պարտավորությունները:
Նրա համոզմամբ՝ ԵՄ-ին հետաքրքրում են Հայաստանի նոր հանձնառությունները, որոնք բխում են այս պայմանագրի ստորագրումից:
Հարցին՝ արդյոք Հայաստանն արդեն ներկայացրե՞լ է իր առաջարկները ԵՄ-ին, նա պատասխանեց, որ եղել են միայն ընդհանուր փոխանակումներ և ավելի կոնկրետ առաջարկները առջևում են:
«Ամենակարևորը, որ կողմերը հանձնառու են հարաբերությունները շարունակելու: Միևնույն ժամանակ ԵՄ-ում Հայաստանի նորանշանակ դեսպանը վերահաստատել էր Հայաստանի պատրաստակամությունը՝ շարունակելու խորացնել Հայաստան-ԵՄ երկկողմ հարաբերությունները: ԵՄ-ն ցանկանում է ամրացնել Հայաստան-ԵՄ համագործակցությունը բոլոր այն ոլորտներում, որոնք համատեղելի են Եվրասիական տնտեսական միությանը: Պոտենցիալ ոլորտների ողջ ցանկն ամրագրված է նոյեմբերին Վիլնյուսում կայացած գագաթնաժողովի ժամանակ ընդունված Հայաստան-ԵՄ փաստաթղթում»,- ասաց Պիտեր Ստանոն՝ շարունակելով, որ ակնհայտորեն այս ամենը պետք է լավ հարմարեցվի Հայաստանի պարտավորություններին, որոնք բխում են անդամակցության համաձայնագրից:
Հիշեցնենք, որ նոյեմբերի 1-ից կսկսի գործել Եվրոպական հանձնաժողովի նոր կազմը, որում հանձնակատար Ֆյուլեն ընդգրկված չէ:
