Ռուսական «Վզգլյադ» թերթի փոխանցմամբ՝ Վրաստանի նախագահ Միխեիլ Սաակաշվիլին վետո է դնելու համաներման մասին օրենքի վրա, որն օրեր առաջ ընդունել է երկրի խորհրդարանը: Այս մասին այսօր հայտարարել է «Միասնական ազգային շարժում» կուսակցության առաջնորդներից, պատգամավոր Միխայիլ Մաչավարիանին:
Վերջինիս խոսքերով՝ նախագահը համաձայն չէ քաղբանտարկյալների ցուցակի հետ՝ գտնելով, որ իրականում նրանց մի մասը բանտում է հայտնվել լրտեսության պատճառով. «Նրանք քաղբանտարկյալներ չեն: Պետք է սպասել այդ հաշվով Վենետիկյան հանձնաժողովի եզրակացությանը, որը կլինի հունվարի վերջին-փետրվարի սկզբին: Սաակաշվիլին խորհրդարանին առաջարկելու է վերանայել այն դրույթը, որը լրտեսներին հնարավորություն է տալիս հայտնվել ազատության մեջ»:
Ներկայումս Վրաստանի բանտերում է գտնվում ավելի քան 20,000 մարդ, որոնցից 190-ը ճանաչվել են քաղբանտարկյալներ: Ակնկալվում է, որ Սաակաշվիլիի կողմից հաստատվելուց հետո համաներման մասին օրենքով ազատության մեջ է հայտնվելու ավելի քան 3000 բանտարկյալ:
