Երկրի ՀՆԱ-ում գյուղատնտեսության մասնաբաժինը նախորդ տարիների համեմատ կտրուկ ավելացել է՝ 2011թ.-ին 20% էր, իսկ 2012թ.-ին հավանաբար կկազմի 21%: Այսօր լրագրողների հետ հանդիպման ժամանակ նախարար Սերգո Կարապետյանը հատուկ շնորհակալություն հայտնեց գյուղոլորտի աշխատողներին՝ հավելելով, որ ոլորտի աճին նպաստեցին նաև պետական ծրագրերը՝ վարկավորման սուբսիդավորումը, որը շարունակվելու է հաջորդ տարի, դիզվառելիքի և ազոտական պարարտանյութերի` մատչելի գներով տրամադրումը, սերմնաբուծության զարգացումը, մյուս տարի կավելանա նաև կերային մշակաբույսերի սերմնաբուծության զարգացումը:
Այս տարի 16.9 հազար հա-ով ավելացել են ցանքատարածությունները և կազմել 303.6 հազար հա: 2012-ին, ըստ ՀՀ գյուղատնտեսության նախարարության օպերատիվ տվյալների, գրանցվել է գրեթե բոլոր մշակաբույսերի համախառն արտադրանքի աճ: 2012-ի դեկտեմբերի 25-ի դրությամբ հանրապետությունից արտահանվել է ընդհանուր առմամբ 31.0 հազար տոննա պտուղ, խաղող, բանջարաբոստանային մշակաբույսեր և կարտոֆիլ, որը 87.0%-ով գերազանցում է 2011 թվականի մակարդակը:
Ս. Կարապետյանը գերակա խնդիր համարեց կոոպերատիվների ստեղծման խթանումը` հայտնելով, որ արդեն ստեղծվել են 65 կոոպերատիվներ:
Նախարարը հայտնեց, որ մթերված գյուղարտադրանքի դիմաց արտադրողներին վճարվել է գումարի 99.1%-ը. ընդհանուր արժեքը 26.8 մլրդ դրամ է: Մնացած գումարը` 0.9%-ը, կվճարվի մինչև դեկտեմբերի վերջը: Վերամշակող ընկերությունների կողմից մթերվել է 59.2 հազար տոննա պտուղ-բանջարեղեն: Ավելի քան 40 ընկերություններ իրականացրել են խաղողի մթերում: Ընդհանուր առմամբ մթերվել է 156.6 հազար տոննա խաղող, որը 21.5 տոկոսով գերազանցում է նախորդ տարվա նույն ժամանակահատվածի ծավալը: Խաղողի մթերումների միջին գինը 1 կգ-ի համար կազմել է 142.1 դրամ` նախորդ տարվա 131.9 դրամի դիմաց:
«Եկող տարի մեզ սպասվում է լարված աշխատանք: Եթե այս մեկ-երկու տարին կարելի է անվանել կայունացման տարի, ապա եկող տարվանից մեզ զարգացում է պետք»,- ասաց Ս. Կարապետյանը՝ բնակչությանը մաղթելով երջանկություն, խաղաղություն, առատ սեղաններով տարի և նպատակների իրականացում:
