Երկիրը փոխելու համար պարտադիր չէ աշխատել պետական համակարգում: Ռուսական Дождь հեռուստաալիքին տված հարցազրույցում նման կարծիք է հայտնել գործարար, բարեգործ Ռուբեն Վարդանյանը:
«Ոչ ճիշտ մի այնպիսի դրվածք կա, որ աշխատելով պետության համար՝ դու օգնում ես փոխել երկիրը, իսկ երբ որ պետության համար չես աշխատում, ուրեմն զբաղվում ես սեփական գործերով: Իմ ամբողջ կյանքը ես կարծել եմ և կարծում եմ, որ ես արել եմ այնպիսի բաներ, որոնք փոխել են նաև երկիրը, և դրա համար պարտադիր չէ աշխատել պետական համակարգում: Երբ մենք Ռուսաստանում առաջին բորսան էինք բացում, երբ ստեղծում էինք ֆոնդային շուկան, երբ մենք ստեղծում էինք շատ ու շատ ինստիտուտներ, որոնք պետք էին Ռուսաստանին, երբ ներդրումներ էինք գրավում… դրանք միայն գումար աշխատելու համար չէին»,- ասում է գործարարը:
Նա կարծում է, որ ինքը չի կարող աշխատել պետական մարմիններում, քանի որ իր բնույթն այդպիսի չէ և ինքն իրեն չի տեսնում որպես պետական պաշտոնյա:
«Միշտ չէ, որ հաջողված ձեռնարկատերը կարող է լավ պաշտոնյա լինել,- ասում է Վարդանյանը՝ մեկնաբանելով, որ դրանք պահանջում են աշխատանքային միանգամայն տարբեր հմտություններ:- Ես ինձ վատ պաշտոնյա եմ տեսնում… անգամ ամենահաճելի կաբինետում և միասնական թիմում աշխատելու դեպքում… Ես ձեռնարկատեր եմ, ես վիզիոներ եմ, ես մարդ եմ, ով նոր բան է ստեղծում, իսկ լավ իմաստով ճիշտ բյուրոկրատը չպետք է վիզիոներ լինի…Ես շատ եմ սիրում իմ հայրենիքը և շատ եմ սիրում այն, ինչ անում եմ, և կարծում եմ, որ ես շատ ակտիվորեն փորձում եմ օգնել ավելի լավը դարձնել մեր հայրենիքը»:
Ռուբեն Վարդանյանը խոսել է նաև օրերս Դիլիջանում բացված միջազգային դպրոցից՝ ինչպես է առաջացել գաղափարը, ինչ նպատակ է հետապնդում:
«21-րդ դարը զարմանալի փոփոխությունների դար է, երբ մարդկային ակտիվը, ընդհանրապես մարդը, դարձել է գլխավոր ակտիվը աշխարհում… կրեատիվությունը, ինֆորմացիան օգտագործելու կարողությունը դառնում է հաջողության շատ կարևոր բաղադրիչ: Եվ հարց է առաջանում. իսկ ի՞նչ ենք անում մենք, որպեսզի կրթությունը, որը առանցքային է ազգի ապագայի, երկրի ապագայի գործում, կարողանա մրցակցային լինել… Ինձ համար կարևոր խնդիր է հնարավորինս շատ ուղեղներ գրավելը»,- ասում է գործարարը:
Վարդանյանը նշել է, որ իրենք փորձ են արել ստեղծել մի նախագիծ հետխորհրդային տարածությունում, «որում համատեղվեր միջազգայինը՝ պահպանելով այն մշակութային ավանդույթները, որոնք մեզ համար ընդունելի և հասկանալի են»: Դիլիջան քաղաքի ընտրությունն էլ, ըստ նրա, պատահական չէ: Այն հիանալի քաղաք է, այնտեղ ապրել են մշակույթի բազմաթիվ հայտնի գործիչներ, այնտեղ միախառնված են հայկական, վրացական և ռուսական մշակույթները, կարծում է Վարդանյանը: Հիշեցնելով, որ դպրոց ընդունվել է 97 աշխակերտ ամենատարբեր երկրներից՝ գործարարը կարծիք է հայտնել, որ տարբեր ազգությունների, տարբեր կրոնների պատկանող երեխաները, ապրելով և սովորելով միասին, սովորում են լինել հանդուրժող, հարգել մյուսի մշակույթը և ունենալ այն ընկալելու պատրաստակամություն:
Անդրադառնալով քաղաքականությանը՝ Ռուբեն Վարդանյանը նշել է, որ չի մասնակցում ընտրությունների՝ բացառությամբ նախագահականի, որտեղ ընտրել է Վլադիմիր Պուտինին:
«Մեզնից յուրաքանչյուրը ընտրության հնարավորություն ունի: Եվ ընտրությունը սկսվում է նրանից, թե դու ապրում ես երկրում, թե՝ ոչ: Եթե դու ապրում ես երկրում, դու պետք է հարգես իշխանությունը: Եվ դա շատ կարևոր է… Ինձ դուր է գալիս այն ամենը, ինչ կատարվում է Հայաստանում, այնպես ինչպես Ռուսաստանում, բայց ես կարծում եմ, որ օրենքով ընտրված նախագահին ես պետք է հարգեմ և աջակցեմ, քանի որ նա մարմնավորում է իմ երկիրը, և ես առավելագույնս պետք այնպես անեմ, որ մեզ այստեղ ապրելը լավ լինի»,- ասում է գործարարը:
