Վենեսուելայի նախագահ Ուգո Չավեսն ակտիվորեն վերականգնվում է չարորակ գոյացության հեռացման վիրահատությունից հետո: Ինչպես հաղորդում է Associated Press-ը, այս մասին Վենեսուելայի ազգային հեռուստատեսությամբ հայտարարել է երկրի փոխնախագահ Նիկոլաս Մադուրոն:
«Նա լավ տրամադրություն ուներ: Նա քայլում է և վարժություններ է կատարում»,-ասել է Մադուրոն:
Հանրապետության ղեկավարության նման բարձրաստիճան պաշտոնեայի կողմից արված հայտարարությունը լույս է սփռել Վենեսուելայի նախաահի առողջական վիճակի հետ կապված անորոշության վրա:
Քաղցկեղային հիվանդությունների ուսումնասիրության Լոմբարդիի անվան կենտրոնի բժիշկ Մայքլ Փիշվաիանը նշել է, որ չնայած Չավեսն իր հիվանդը չէ, սակայն այն փաստը, որ նա ինքնուրույն տեղաշարժվում է, խոսում է օրգանիզմի գործառույթի վերականգնման և մոտ ժամանակներս Վենեսուելա վերադառնալու հավանականության մասին:
Հիշեցնենք, որ 2011 թ. հունիսին Ուգո Չավեսը ենթարկվել էր չարորակ ուռուցքի հեռացման վիրահատության, սակայն մի քանի ամիս հետո նրա մոտ հայտնաբերվել էր նոր ուռուցք: Այս տարվա փետրվարին Հավանայի հիվանդանոցներից մեկում Չավեսը ենթարկվել էր նոր վիրահատության: Սակայն 2012 թ. դեկտեմբերին Վենեսուելայի նախագահը հայտարարեց, որ ստիպված է կրկին մեկնել Կուբա՝ ևս մեկ վիրահատության համար։
