Դեկտեմբերի 23-ին ՀՀ պաշտպանության նախարարությունից տեղեկություն ստացվեց, որ զորահավաքակայանից զորամաս տեղափոխվելու ճանապարհին վատացել և հոսպիտալում մահացել էր նորակոչիկ Նորայր Նվերի Սահակյանը՝ ծնված 1994 թ.: Նորակոչիկի անսպասելի մահվան մասին լուրը ցնցեց ոչ միայն տղայի հարազատներին, այլև ամբողջ համացանցը, լրատվամիջոցները, որտեղ հրապարակվեց լուրը, քանի որ հարազատների պնդմամբ՝ առողջ տղայի մոտ խնդիր է առաջացել զորամասի ճանապարհին, որի արդյունքում նա տեղափոխվել է հոսպիտալ: Հոսպիտալից դեկտեմբերի 22-ին տղան կապ է հաստատել հարազատների հետ, ասել, որ ջերմություն ունի, իսկ հաջորդ օրը՝ մահացել:
«Առաջին լրատվական»-ի հետ զրույցում Նորայր Սահակյանի հայրը՝ Նվեր Սահակյանն, ասաց, որ մինչև բանակ գնալն իր որդին առողջական ոչ մի բողոք չի ունեցել, եղել է լիովին առողջ, ավելին՝ այնքան առողջ, որ երկար տարիներ բոքսով է զբաղվել:
Նվեր Սահակյանն ասաց, որ մոտավորապես գիտեն, թե հոսպիտալում ինչ է եղել, ինչ բուժօգնություն է ցուցաբերվել տղային: Նա այսօր չցանկացավ մանրամասներ ներկայացնել, թե ինչ է եղել, և ինչ խնդիր է առաջացել: Նրա կարծիքով՝ արվել է ամեն հնարավոր բան, որպեսզի երեխան ողջ մնա, սակայն նրան փրկել չեն կարողացել:
«Երեխան առողջական խնդիր ունեցել է, որը դեռևս պարզ չէ ո՛չ մեզ, ո՛չ բժիշկների համար: Անարդարացի բողոքներ մենք չենք ուզում անել: Ես չեմ կարող անպատասխանատու հայտարարություններ անել, հետևողական կլինենք հանգամանքների բացահայտմանը»,- նշեց նա:
Թե ինչ հանգամանքների պատճառով է մահացել 18-ամյա նորակոչիկը, դեռևս հայտնի չէ, սակայն հարուցված է քրեական գործ, ընթանում է նախաքննություն:
Լուսանկարը՝ Գագիկ Շամշյանի
