Ինչպես ավելի վաղ տեղեկացրել էինք, այսօր «Գոլդեն Փելես Ծաղկաձոր» հյուրանոցում վաղ առավոտից մեկնարկել էր «Կատարողական վարույթի խնդիրների ավանդական և նորարարական լուծումները» թեմայով երկրորդ միջազգային գիտագործնական համաժողովը:
Լրագրողների հետ զրույցում ՀՀ գլխավոր հարկադիր կատարող Միհրան Պողոսյանն ընդգծեց, որ ՀՀ հարկադիր ծառայությունը արդեն երկրորդ անգամ է կազմակերպում միջազգային գիտաժողով. «Առաջինը նվիրված էր մասնավոր և պետական համակարգերի համակցությանը, և որոշակի աշխատանքներ ծավալելուց հետո հարկադիր ծառայությունն ընտրեց այն ուղղվածությունը, ինչ կա այսօր՝ պետական կառավարման համակարգ: Այսօրվա միջազգային գիտաժողովի թեման հարկադրանքի կիրառման սահմաններն են»:
Նա ավելացրեց, որ տարբեր պետություններ տարբեր մեթոդնր են օգտագործում, և մեզ համար կարևոր է հասկանալ՝ ինչ չափով և ինչ ոլորտներում պետք է հարկադրանքը կիրառել: «Պետք է հասկանալ մի բան. մի կողմից՝ հարկադրանքը պահանջատիրոջ պահանջներին է ուղղված, այսինքն՝ մենք պահանջատիրոջ կողմից ապահովում ենք դատավճռի կատարումը նրա համար: Բայց մյուս կողմից էլ՝ պետք է հասկանալ, որ գոյություն ունի մարդու իրավունքների անվտանգություն, և մենք պետք է կարողանանք հարկադրանքի կիրառումը մարդու իրավունքներին խափանման խնդրի մեջ չներխուժել: Սա է մեր գիտաժողովի առանցքը»,- ասաց նա:
Պողոսյանն ընդգծեց, որ գուցե կարողանան որոշ նորամուծություններ մտցնել նաև այս համաժողովի արդյունքում:
Հարցին՝ արդյոք համաժողովին ներկա պետությունները այն մոդելո՞վ են առաջնորդվում, որը ընտրել է Հայաստանը, Միհրան Պողոսյանը պատասխանեց. «Միայն Ռուսաստանում է, որ վարչական խախտումների վերաբերյալ արդեն երեք տարի այս փորձն է կիրառվում, այսինքն՝ առանց դատարանի վճռի վարչական իրավախախտումը գալիս է հարկադիր ծառայության ոլորտ, իսկ Էստոնիայում, օրինակ, մասնավոր է»:
Պողոսյանի դիտարկմամբ՝ այն, որ 15 երկիր առաջին դեմքերի մակարդակով է եկել, վկայում են թեմայի կարևորությունը, հարկադիր ծառայության դերն ու նշանակությունը:
Նա ընդգծեց, որ վերջին շրջանում 60 անգամ ավելացել է իրենց աշխատանքը. «Եթե 6-7 տարի առաջ ամսական 2000 վարույթ էինք հարուցում, այսօր արդեն՝ 120.000 վարույթ. « Ես խոսում եմ մեկ ամսվա մասով»:
Համաժողովին ներկա Ազգային ժողովի նախագահ Գալուստ Սահակյանից լրագրողները հետաքրքրվեցին՝ արդյոք օբյեկտի՞վ են հարկադիր կատարողները. «Եկեք այն դիտարկենք որպես երիտասարդ կառույց: Պետք է դրականորեն արժևորել, իրավաբաններն էլ են խմբերի բաժանվում, փորձում ենք որոշակի մեղմությունների գնալ: Առավել ևս մարդու իրավունքների պաշտպանն է Սահմանադրությանը դիմել, կարծում եմ՝ մինչև Սահմանադրությունը վերջնականապես իր խոսքը չասի, գնահատականներ տալը ճիշտ չէ»:
Դատական կատարողների միջազգային միության նախագահ Լեո Նետենը լրագրողների հետ զրույցում ասաց, որ եթե նայում ենք Հայաստանում հարկադիր համակարգի զարգացմանը, ապա կարող ենք ասել, որ աշխարհում այն տասներորդ հորիզոնականում է. «Դրա պատճառն այն է, որ Հայաստանում հարկադիր ծառայությունը ստեղծման օրվանից ուսումնասիրում է միջազգային փորձն ու պրակտիկան և բոլոր տեղերից փորձում է ամենալավը վերցնել ու այն տեղայնացնել Հայաստանում: Մենք որպես համաշխարհային միություն կարող ենք ասել, որ սա է մեր մոտեցումը, այսինքն՝ եթե ստեղծվում է հարկադիր ծառայություն, ապա պետք է ուսումնասիրել միջազգային փորձն ու այն տեղայնացնել ձեր երկրում»: