«Հանրապետական» կուսակցության խոսնակ, ԱԺ փոխնախագահ Էդուարդ Շարմազանովը հաղորդագրություն է տարածել:
Լևոն Տեր-Պետրոսյանի չառաջադրվելը Էդուարդ Շարմազանովի գնահատմամբ՝ սենսացիոն չէր կարող լինել և սպասելի էր: «Համենայնդեպս, վերջին տարիները ցույց էին տալիս, որ Տեր-Պետրոսյանը պատրաստվում է քաղաքականությունից հեռանալու: Այլ հարց է, որ ինքը պատրաստվում էր դա անել մի քիչ այլ ձևով. դուռը, նենց, լավ շրխկացնելով: Սակայն քանի որ դա իր մոտ չստացվեց, նա սկսում է դրա համար լավ առիթներ փնտրելը»,- նշում է ՀՀԿ խոսնակը՝ հիշելով, որ պատմության ֆակուլտետի առաջին կուրսում ուսանողներին սովորեցնում էին առիթը տարբերակել պատճառից:
ՀՀԿ խոսնակը նաև հիշեցրեց իր այն հայտարարությունը, որ ՀԱԿ առաջնորդի առաջադրումը նրա կողմից կլիներ քաղաքական ինքնասպանություն: «Մանավանդ, որ որպես խելացի քաղաքական գործիչ, հասկանում է, որ նույն գետը երկու անգամ չեն մտնում, և էդ իմաստով նա պատրաստում էր իր հեռանալը, այն պարագայում, երբ մենք տեսնում էինք, որ թե՛ ՀԱԿ-ը և թե՛ Լևոն Տեր-Պետրոսյանը վերջին շրջանում որևէ լուրջ ազդեցություն չունեին ժողովրդի տրամադրությունների վրա»։
Հիշեցնենք, որ ՀՀ առաջին նախագահը «Չորրորդ ինքնիշխանություն» օրաթերթին տված հարցազրույցում հայտարարել է, որ իր առաջադրումը գրեթե անհնար է իր վաթսունութ տարեկան լինելու և ևս մի տեխնիկական պատճառով, որի մասին, սակայն, չի ցանկանում բարձրաձայնել, քանի որ «մեր ցինիկ իրականության մեջ դրան քչերը կհավատան»:
«Չի կարող 68 տարեկան լինելը պատճառ լինել Լևոն Տեր-Պետրոսյանի համար, որը, հեռու իրենից, ոչ անբուժելի հիվանդ է, խոսքը տեղն է, տեսքը՝ տեղն է: Այնպես որ, նրա կարգի քաղաքական գործչի համար շատ տխուր և չհմնավորված էր ներկայացված պատճառը»,-ասաց Էդուարդ Շարմազանովը, ում համար համոզիչ չեն նաև Կոնգրեսի առաջնորդի կողմից բերված օրինակները, որ պատկառելի տարիքում և հանգիստ իրավիճակներում նախագահի թեկնածու չեն առաջադրվում: Նա այս իմաստով միակ բացառություն էր արել ԱՄՆ նախկին նախագահ Ռոնալդ Ռեյգանին, սակայն ՀՀԿ խոսնակը համաձայն չէ և էլի օրինակներ կարող է բերել, քանի որ ասաց. «Ֆրանսուա Միտերանը քանի՞ տարեկանում էր նախագահ աշխատում, Ժակ Շիրակը՞, այսօր Շիմոն Պերեսը որպես Իսրայելի նախագահ քանի՞ տարեկան է»:
Ամփոփելով՝ ՀՀԿ խոսնակն ասաց, որ Կոնգրեսի առաջնորդի որոշման պատճառը մեկն է: Այն է՝ նա հասկացավ, որ այն «քաղաքական ֆուրորը», որը նրան հաջողվեց 2008-ի վերադարձի ժամանակ, այլևս նրան չի հաջողվի: «Որովհետև, ինչպես կասեր Շիլլերը՝ «մավրը արեց իր գործը, մավրը կարող է հեռանալ»: Խնդիրը էդ է. ինքը շատ լավ հասկանում էր, որ էլ որևէ ազդեցություն չունի, նաև իր թիմը, քանի որ արդեն հեռու են այն ժամանակները, երբ նրա խոսքը մարդիկ թաքուն լսում էին դիսկերով»:
Հիշեցնենք, որ Լևոն Տեր-Պետրոսյանն իր չառաջադրվելու պատճառաբանության մեջ նաև նշել էր, որ միայն արտակարգ, քաոսային իրավիճակներում են պատմական, քաղաքական հայտնի դեմքերը առաջադրումների մասին որոշում կայացրել:
ՀՀԿ խոսնակի գնահատմամբ՝ այդ արտահայտությամբ ՀՀ առաջին նախագահը խոստովանեց, որ 2008-ի քաղաքական և բարոյական ճգնաժամից հետո Սերժ Սարգսյանի իշխանությանը հաջողվել է հինգ տարի անց ունենալ բոլորովին այլ՝ բարոյահոգեբանական ու քաղաքական առումով նոր Հայաստան:
Ինչ վերաբերում է ՀԱԿ առաջնորդի այն հայտարարությանը, որ միևնույն է՝ Սերժ Սարգսյանը լեգիտիմ չի լինելու, ապա Էդուարդ Շարմազանովն ասաց, որ դա իր համար հեռացող, նեղացած գեներալի խոսք է ընդամենը:
