Նիդերլանդների դատական կատարածուները կալանքից հանել են Apple ընկերության հիմնադիր Սթիվ Ջոբսի համար պատրաստված զբոսանավը, որը կալանքի տակ էր դրվել անցած շաբաթ՝ նավի դիզայների ֆինանսական հավակնությունների պատճառով,- հաղորդում է Agence France-Presse-ը:
Ջոբսի ընտանիքի փաստաբան Ժերար Մուսսոն գործակալությանը տված հարցազրույցի ժամանակ հայտարարել է, որ նավն այլևս կալանքի տակ չի գտնվում: Փաստաբանի խոսքերով՝ բանկային հաշվին փոխանցվել է երաշխիք նամակ և նավի կապիտանը սպասում է հարմար եղանակային պայմանների՝ Ամստերդամի նավահանգստից հեռանալու համար։
Venus զոբսանավը, որի ընդհանուր արժողությունը կազմում է 100 միլիոն եվրո, նախագծվել էր Ջոբսի և հայտնի դիզայներ Ֆիլիպ Սթարկի կողմից: Սթարկի փաստաբանները հայտարարել էին, որ դիզայնի մշակման համար պարգևատրումը կազմել է ինը միլիոն, սակայն իրենց հաճախորդը ստացել է այդ գումարի 2/3 մասը: Նավը առգրավվել էր Ամստերդամի նավահանգստում և մնալու էր այնտեղ, քանի դեռ Սթիվ Ջոբսի ժառանգները չէին վճարել ենթադրյալ պարտքը:
Նշենք, որ զբոսանավի երկարությունը կազմում է 80 մ, նավի կորպուսը պատրաստված է ալյումինից, իսկ իլյումինատորները՝ ապակուց, որը Apple-ը կիրառել է իր արտադրանքի համար:
