Եվրոպական միությունը շարունակելու է աշխատել Հայաստանի հետ՝ անկախ Հայաստանի ՄՄ անդամակցությունից: «Առաջին լրատվական»-ի հետ զրույցում այս մասին ասաց Հայաստանում Մեծ Բրիտանիայի արտակարգ և լիազոր դեսպան Քեթրին Լիչն՝ անդրադառնալով Հայաստանի եվրոպական հեռանկարներին հոկտեմբերի 10-ից հետո, եթե, ինչպես այսօր ասաց ՌԴ նախագահ Վլադիմիր Պուտինի օգնականը, Հայաստանը միանա Մաքսային միությանը:
Դեսպանը նշեց, որ անցած տարի Վիլնյուսում կայացած Արևելյան գործընկերության գագաթնաժողովի ժամանակ Եվրամիության արտաքին քաղաքականության պատասխանատու Քեթրին Էշթոնն ու ՀՀ ԱԳ նախարար Էդուարդ Նալբանդյանը փոխանակեցին նամակներ, որով նրանք հաստատեցին Հայաստան-Եվրոպական միություն համագործակցության շարունակականությունը որոշակի ոլորտներում՝ արդարադատություն, օրենքների բարելավման, մարդու իրավունքների ոլորտը և այլ ոլորտներ: Ըստ նրա, դա նշանակում է, որ մենք շարունակելու ենք աշխատել Հայաստանի հետ: «Հաջորդ փուլը կլինի այն, որ Հայաստանն ու Եվրոպական միությունը բանակցեն հարաբերությունների իրավական նոր համաձայնագիրը, ըստ որի կորոշվի, թե ինչ ուղղությամբ է համագործակցությունը լինելու: Պետք է թարմացվի նաև 1999թ. հաստատված համագործակցության ծրագիրը: Սա կարող է որոշակի ժամանակ խլել, բայց ես գիտեմ, որ կողմերը հանձնառու են անել դա: Այս ընթացքում համագործակցությունը չի դադարում: Ինչպես գիտեք, նախորդ շաբաթ ԵՄ-ն հայտարարեց արդարադատության ոլորտում Հայաստանում բարեփոխումների նոր ծրագրի մասին»,- նշեց նա:
Խոսելով բոլորովին վերջերս ԵԽԽՎ-ում ‹‹Բռնության աճը Լեռնային Ղարաբաղում և ադրբեջանական այլ գրավյալ տարածքներում» վերտառությամբ զեկույց պատրաստելու որոշումից՝ ասաց. «Մենք աջակցում ենք ԵԱՀԿ Մինսկի խմբի համանախագահների բանակցությունների քաղաքականությանը՝ որպես Լեռնային Ղարաբաղի հակամարտության կարգավորման միակ ձևաչափ, և ես վստահ չեմ, որ այս զեկույցն ինչ-որ բանով օգնելու կամ ավելացնելու է ԵԱՀԿ Մինսկի խմբի աշխատանքը, ուստի ես շատ հուսով եմ, որ զեկույցը կկազմվի օբյեկտիվ կերպով, և բոլոր կողմերը հնարավորություն կունենան իրենց կարծիքն արտահայտել զեկույցի վերջնական տարբերակի վերաբերյալ, որն էլ կհանգեցնի նրան, որ զեկույցը վերջնական տարբերակում կլինի հավասարակշռված»:
Անդրադառնալով հոկտեմբերի երկրորդ կեսին Փարիզում Ալիև-Սարգսյան հանդիպմանն՝ ասաց, թե գոհ է, որ նախագահները սկսել են հանդիպել շատ ավելի հաճախ, սա շատ կարևոր է գործընթացին խթան հաղորդելու տեսանկյունից: Դեսպանը լիահույս է, որ նախագահները կգտնեն ճանապարհ առաջ մղելու բանակցությունները և դիտարկելու բանակցությունների ձևաչափը: «Հույս ունեմ, որ այդ հանդիպումը նոր խթան կհանդիսանա բանակցությունների շարունակականությունն ապահովելու և լուծում գտնելու ճանապարհին»,- ասաց դեսպան Լիչը:
