«Վրացական երազանք. ժողովրդավարական Վրաստան» կուսակցությունը ծրագրում է դառնալ ձախամետ «Եվրոպական սոցիալիստական կուսակցության» անդամ: Այս մասին EurActiv հրատարակությանը հայտնել է երկրի արտաքին գործերի նախարար Մայա Պանջիկիձեն:
EurActiv-ի հետ հարցազրույցի ժամանակ Պանջիկիձեն հայտարարել է, որ վարչապետ Բիձինա Իվանիշվիլիի և նախագահ Միխեիլ Սաակաշվիլիի միջև կոաբիտացիան բարդ գործ է: Նրա խոսքերով՝ նախագահն իր արտասահմանյան ուղևորություններում տարածում է այն կարծիքը, որ «Վրաստանի կառավարությունն ահավոր բաներ է անում»:
«Նախագահը լոբբիստների մեծ ցանց ունի, ովքեր էլ գիշեր-ցերեկ աշխատում են տարածել լուրեր, որ Վրաստանում ժողովրդավարությանը վտանգ է սպառնում այն պահից ի վեր, երբ վարչապետի «Վրացական երազանք» կուսակցությունն աշխատանքի անցավ: Որոշ արևմտյան պահպանողական քաղաքական գործիչներ, լսելով Սաակաշվիլիի հաղորդագրությունները, չեն ցանկանում հանդիպել «Վրացական երազանք»-ի ներկայացուցիչների հետ:
EurActiv-ը նշում է, որ սա առաջին դեպքը չէ, երբ «Վրացական երազանք»-ի ակտիվիստները բողոքում են ԵՄ որոշ ուժերի կողմից Սաակաշվիլիին ցուցաբերած աջակցության դեմ:
«ԵՄ պաշտոնյաներն իրենց հասցեին հնչած մեղադրանքները կտրականապես չեն ընդունում»,- գրում է EurActiv-ը:
Մայա Պանջիկիձեն հայտարարել է, որ Իվանիշվիլիի կուսակցությունն, անդամակցելով եվրոպական ձախամետ սոցիալիստներին, իր հարաբերությունները չի դադարեցնում «Եվրոպական ազգային կուսակցության» հետ:
