Այսօր ԿԳ նախարար Արմեն Աշոտյանը և Հայաստանում ՄԱԿ-ի մշտական համակարգող Դաֆինա Գերչևան ներկայացրին երեք նախարարների կողմից հաստատված՝ հաղորդակցության ռազմավարությունը 2011-2015 թվականների համար ծրագիրը:
Ինչպես նշեց ԿԳ նախարարը, այն ներկայացվել է ԱԺ քննարկմանը և դեռևս երկու ընթերցում պետք է անցնի: Այսպիսով, ինչ է նշանակում հաղորդակցության ռազմավարություն: Նախարարի խոսքերով, ռազմավարության նպատակն է հնարավորինս թափանցիկ գործունեություն ծավալել ԶԼՄ-ների և քաղաքացիական այլ ինստիտուտների հետ, որը մի կողմից նախարարության նորամուծությունը կմատուցի հասարակությանը, մյուս կողմից օպերատիվ կարձագանքի մամուլով ահազանգված խնդիրներին:
«Այս ռազմավարությունը մեր հասարակության պայքարի բաղկացուցիչ մասն է: Կրթական բարեփոխումները չեն հասնի իրենց բուն նպատակին,եթե հասարակության մեջ չձևավորենք աջակցողների հոծ բանակ»,- նկատեց Արմեն Աշոտյանը:
Ինչ վերաբերում ֆինանսավորմանը, Աշոտյանը տեղեկացրեց, որ ՄԱԿ-ի միջոցով դոնորներ են ներգրավվելու, իսկ որոշ միջոցներ արդեն հաստատված են 2011 թվականի պետբյուջեում: Նախարարը շնորհակալություն հայտնեց Գերչևայից ծրագրին իր աջակցությունը ցուցաբերելու համար:
Դաֆինա Գերչևան էլ իր կողմից պատրաստակամություն հայտնեց ծրագրին աջակցություն բերելու համար և հույս հայտնեց, որ ԱԺ ռազմավարությունը կընդունվի, ինչպես նաև նկատեց, որ ծրագրի հաջողությունը կախված է նրանից, թե հասարակությունը ինչպես կընկալի և ինչ աջակցություն կցուցաբերի: Ինչ վերաբերում է ֆինանսավորմանը, Գերչևան այն բաժանեց երեք կարևոր խմբերի և նշեց, որ առաջին խմբի համար նյութական միջոցներ չեն պահանջվում, սակայն այն բավական աշխատատար է, երկրորդ խմբում արդեն գումարներ են պահանջվում, իսկ երրորդ խմբում համեմատաբար լուրջ ներդրումներ են պահանջվում, և իրենք ՄԱԿ-ի հետ պատրաստակամ են գումար հայթայթել։
ԿԳ հասարակայնության հետ կապերի վարչության պետ Արթուր Բաղդասարյանն էլ նկատեց, որ մինչև ռազմավարությանը հասնելը կատարվել են բավական լուրջ ուսումնասիրություններ, և արդյունքներով հետևյալ առաջնային քայլեր են հաստատվել` տեղեկատվության մատչելիություն որոշ լրատվամիջոցների, սահմանափակ գիտելիքների բավարարում, հաղորդակցության ձևերի և մեթոդների ճկունություն:
