«Ադրբեջանի արտգործնախարարությունը զեկույցից առանձնացրել է որոշակի մասեր և, իր շահերից ելնելով, յուրովի մեկնաբանություններ տվել, սակայն դա չի նշանակում, որ դա է դաշտային առաքելությունը, և դա է նրա նպատակը»,- անդրադառնալով Ադրբեջանի ԱԳՆ-ի հայտարարությանը, թե իրենք ողջունում են ԵԱՀԿ ՄԽ-ի դաշտային առաքելության զեկույցը, «Առաջին լրատվական»-ի հետ զրույցում կարծիք հայտնեց ԱԺ ՀՀԿ խմբակցության պատգամավոր Արտակ Զաքարյանը:
Խոսելով հոկտեմբերին իրականացված դաշտային առաքելության արդյուքներն ամփոփող զեկույցի մասին՝ պատգամավորն ասաց, որ զեկույցի վերաբերյալ ԼՂՀ ԱԳՆ-ն տարածել է իր մեկնաբանությունը և ավելի մանրամասն է անդրադարձել իրականությանն ու ԼՂ շուրջ անվտանգության գոտում ստեղծված իրավիճակին:
Զաքարյանի գնահատմամբ, վերջնական մեկնաբանությունները կտրվեն այն ժամանակ, երբ դաշտային առաքելություն կիրականացվի նաև Ադրբեջանի կողմից օկուպացված հայկական տարածքներում: Սակայն, ըստ նրա, առաջին դիտարկմամբ, բավականին դրական էլեմենտներ կան, այն առումով, որ կողմերին կոչ է արվում, որ բանակցային գործընթացում կառուցողական դիրքորոշում ձեռք բերեն և ընդունվում է ի գիտություն, որ առանց ղարաբաղյան կողմի մասնակցության հնարավոր չէ հասնել կոնֆլիկտի կարգավորման ուղղությամբ լուծումների:
