Ամերիկացի հայտնի սենատոր Ջո Լիբերմանը զգուշացրել է Սիրիայի նախագահ Բաշար Ալ-Ասադին, որ նրան սպասվում է Քադաֆիի ճակատագիրը, եթե Սիրիայի նախագահը բանակցություններ չսկսի ազատության համար պայքարողների հետ: «Եթե Ալ-Ասադը սկսի անել այն, ինչ անում էր Քադաֆին, այսինքն՝ դռնեդուռ ընկնել ու սպանել նրանց, ովքեր իր կողմը չեն, ապա մենք նախադեպ ունենք, որը հաստատել է միջազգային հանրությունը Լիբիայում, և դա ճիշտ որոշում էր»,- ասել է Լիբերմանը` Fox News-ին տված հարցազրույցում:
«ԱՄՆ մի կողմ չի քաշվելու` հետևելով սպանդին, որը սեփական ժողովրդի դեմ սանձազերծել է Ալ-Ասադ կրտսերը: Այնպիսի սպանդ, ինչպիսին ժամանակին կազմակերպել էր նրա հայրը: Մենք հետևողական կլինենք ամերիկյան մեր արժեքները պնդելու հարցում: Բացի այդ, ԱՄՆ-ը կլինի ժողովրդի կողմում»,- նշել է սենատորը:
Ինչպես հաղորդում է BBC-ն, Սիրիայի կառավարությունն արդեն այսօր հրաժարական կտա: Բաշարը Ալ-Ասադը չի ցանկանում հետևել հարևան վարչակազմերի տխուր օրինակին և փորձում է առաջ ընկնել քաղաքական հակառակորդներից: Այս մասին հաղորդում է Al-Arabia-ն:
Հայտնի է, որ երեկ Դարա’ա կրկին անհանգիստ էր: Երեկ կառավարական ուժերը ստիպված են եղել արցունքաբեր գազ օգտագործել ցուցարարներին ցրելու համար: Human Rights Watch տվյալներով, մարտի 18-ից միայն այս քաղաքում սպանվել է 61 մարդ: «Զինվորները զենք են կիրառում բոլոր նրանց դեմ, ովքեր գտնվում են մզկիթի մոտ»,- մեջբերելով ականատեսներից մեկի խոսքերը ` գրում է BBC-ն: Մզկիթը, որի մասին խոսում էր ականատեսը, Օմարի մզկիթն է, որտեղ ծավալվել են հիմնական գործողությունները:
Վերլուծաբանները նաև նշում են, որ երկրի ներսում իշխանությունները միակարծիք չեն ելույթները ճնշելու կամ ապստամբների հետ բանակցությունների գնալու հարցում: Այդ են վկայում նաև խաղաղասեր հայտարարությունները և միաժամանակ ցուցարարներին դաժան ճնշելու փաստերը: