«Ընդդեմ կանանց նկատմամբ բռնության» կոալիցիան բաց նամակով դիմել է ՀՀ Վարչապետ Հովիկ Աբրահամյանին, որը ներկայացնում ենք ստորև.
«Մեծարգո՛ պրն Վարչապետ, 2010թ. հոկտեմբերի 1-ին դաժան ծեծի արդյունքում զոհվեց 20-ամյա Զարուհի Պետրոսյանը: Զարուհու դեպքը, անշուշտ, միակը չէր Հայաստանում, սակայն նախադեպային էր, քանի որ նպաստեց Հայաստանում ընտանեկան բռնության երևույթի տարածվածության մասին դիսկուրսի առաջացմանը, ԶԼՄ-ների կողմից մեր հասարակությունում թաքնված ընտանեկան բռնության դեպքերի վերծանմանն ու լուսաբանմանը, քաղաքացիների կողմից այդ երևույթի մասին իրազեկվածության բարձրացմանը:
Զարուհու դեպքից հետո այս հարցով մտահոգված կազմակերպությունները ստեղծեցին Ընդդեմ կանանց նկատմամբ բռնության կոալիցիան, որի նպատակն է պայքարել Հայաստանում կանանց նկատմամբ բռնության դեմ: 2010-ից ի վեր կոալիցիան ամեն տարի հոկտեմբերի 1-ին իրականացնում է հանրային միջոցառում՝ ուղղված ընտանեկան բռնության կանխարգելմանը՝ նպատակ ունենալով հոկտեմբերի 1-ը դարձնել «Ընտանեկան բռնության դեմ պայքարի ազգային օր»:
Համաձայն ՀՀ Ոստիկանության տվյալների՝ 2013 թվականին ընտանեկան բռնության են ենթարկվել 580 կանայք, իսկ հասարակական կազմակերպությունների գրանցած տվյալների համաձայն` գրանցվել է կանանց և երեխաների նկատմամբ ընտանեկան բռնության 1400 դեպք: 2014 թ. առաջին 9-ը ամիսների ընթացքում ընտանեկան բռնության հետևանքով մահացել է 9-ը կին:
Նպատակ ունենալով կանխարգելել ընտանեկան բռնությունը Հայաստանում՝ 2007թ.-ից ի վեր մշակվել և քննարկվել է «Ընտանեկան բռնության մասին» ՀՀ օրենքի նախագիծը: Նախագիծը վերանայվել է մեծ թվով միջազգային և տեղական փորձագետների կողմից և 2009 թ. սեպտեմբերին ներկայացվել ՀՀ աշխատանքի և սոցիալական հարցերի նախարարություն:
2010թ. նոյեմբերի 12-ին օրենքի նախագիծը ներկայացվել է ՀՀ կառավարություն քննարկման: Շրջանառության և քննարկումների արդյունքում համապատասխան փոփոխություններով լրամշակված օրենքի նախագիծը 2012թ. նոյեմբերի 28-ին ներկայացվել է ՀՀ Վարչապետին` հավանության արժանանալու համար: Սակայն
2013թ. փետրվարի 11-ին ՀՀ աշխատանքի և սոցիալական հարցերի նախարարությունը ստացել է Կառավարության եզրակացությունը, համաձայն որի՝ վերջինս նպատակահարմար չի գտել ընդունել «Ընտանեկան բռնության մասին» ՀՀ օրենքը, և Կառավարության կողմից հանձնարարություն է տրվել նախագծի դրույթները ներառել այլ իրավական ակտերում: 2013 թ. Ընդդեմ կանանց նկատմամբ բռնության կոալիցիայի փորձագիտական խումբը, որտեղ ներգրավված են իրավաբաններ և ոլորտում աշխատող փորձագետներ լրամշակել են «Ընտանեկան բռնության մասին» օրենքը` այն համապատասխանեցնելով ՀՀ Արդարադատության նախարարության նկատառումներին: Ներկայումս լրամշակված «Ընտանեկան բռնության կանխարգելման» օրենքը պատրաստ է Ազգային ժողովում շրջանառության դրվելու համար (կից ներկայացվում է օրինագիծը և իրավական հիմնավորումները):
Այս առիթով մենք կոչ ենք անում Կառավարությանը հստակ քայլեր ձեռնարկել և հանձն առնել այն պարտավորությունների իրականացմանը, որոնք արտահայտված են «Ընդդեմ գենդերային բռնության» ազգային ծրագրում և ՀՀ–ի կողմից վավերացված միջազգային մի շարք փաստաթղթերում:
Կարևորելով «Ընտանեկան բռնության կանխարգելման» ՀՀ օրենքը` պահանջում ենք ընդունել այն և ակնկալում ենք Ձեր միջամտությունը այս հարցի կապակցությամբ:
Ակնկալում ենք նաև Ձեր անմիջական օգնությունը հոկտեմբերի 1-ը «Ընտանեկան բռնության դեմ պայքարի ազգային օր» հռչակելու կապակցությամբ»:
