Կառավարության նիստից հետո այսօր նախարարները, բացառությամբ արդարադատության նախարարի, գերադասեցին հեռանալ հետնամուտքով՝ թերևս գերադասելով չհանդիպել կառավարության շենքի առաջ հավաքված փոքր ու միջին բիզնեսի ներկայացուցիչներին, որոնք բողոքի էին եկել շրջանառության նոր հարկի դեմ:
Լրագրողների հետ զրուցեց արդյունաբերողների և գործարարների միության նախագահ Արսեն Ղազարյանը, որը նույնպես մասնակցել էր նիստին:
Ինչպես հայտնի է՝ կառավարության այսօրվա նիստում վավերացվեց Հայաստանի` Եվրասիական տնտեսական միությանը միանալու պայմանագիրը, որում որոշ փոփոխություններ են կատարվել: Ղազարյանի խոսքով՝ առաջնային նշանակություն ունեցող հումքի, սարքավորումների, սպառողական շուկայի համար էական նշանակություն ունեցող ապրանքատեսակների դեպքում պահպանվում են հին դրույքաչափերը: Քանի տարով` դեռ պարզ չէ:
«750 ապրանքատեսակների մասով բացառություններ են արվել, և դրանց նպատակն այն է, որ դրսի շուկաներից, Արևմուտքից բերվող ապրանքների դեպքում պահպանենք այն դրույքաչափերը, որոնք առկա են»,- ասաց արդյունաբերողների և գործարարների միության նախագահը:
Ինչ վերաբերում է կառավարության շենքի առաջ հավաքվածների բողոքին, ապա արդյունաբերողների և գործարարների միության նախագահի խոսքով՝ ժամանակին իրենք առաջարկել են՝ 3.5 տոկոս պահպանել նրանց համար, ովքեր չեն կարող փաստաթղթերով աշխատել, իսկ 1 տոկոս շահութահարկ սահմանել փաստաթղթերով աշխատողների համար:
Արսեն Ղազարյանը չի կարծում, որ սա փոքր բիզնեսի դեմ է, և որ մեծից պետք էր սկսել փաստաթղթային կանոնակարգումը: «Սա շուկան կանոնակարգելու համար է: Լավ կլինի` տանք այլընտրանք. ովքեր ի վիճակի չեն փաստաթղթերով աշխատել, աշխատեն 3.5 տոկոսով»,- ասաց Ղազարյանը:
Մանրամասները դիտեք տեսանյութում: