Ուրբաթ Սլովենիայի հազարավոր բնակիչներ մասնակցել են երկրի տարբեր քաղաքներում կազմակերպված հակակառավարական ցույցերին: Այս մասին հաղորդում է RIA Novosti-ն:
Յանեզ Յանշիի կառավարության հրաժարականի պահանջով գլխավոր ցույցը տեղի է ունեցել երկրի մայրաքաղաք Լյուբլյանայի կենտրոնական հրապարակում: Տարբեր տվյալների համաձայն` բողոքի ակցիային մասնակցել է 5-10 հազար մարդ, այդ թվում` ուսանողներ, թոշակառուներ, միջին տարիքի անձինք և երեխաներ: Ցուցարարները վիրավորական կարգախոսներ են վանկարկել իշխանությունների հասցեին, իսկ ոստիկաններին բաժանել են ծաղիկներ:
Ակցիայի կազմակերպիչները հրապարակել են 10 կետից բաղկացած պահանջներ: Նախևառաջ նրանք պահանջում են ամբողջ քաղաքական էլիտայի հրաժարական` ներառյալ խորհրդարանի և կառավարության ներկայացուցիչների, իշխող կոալիցիայի և ընդդիմության: Մյուս պահանջներից են` դատական համակարգի արմատական բարեփոխումը, անօրինական ճանապարհով ձեռք բերված ակտիվների առգրավումը, սահմանադրության փոփոխությունը:
Ոստիկանությունը հաղորդել է Լյուբլյանայում մի քանի ձերբակալվածների մասին: Բողոքի ակցիան այս անգամ ավարտվել է առանց լուրջ միջադեպերի` ի տարբերություն անցած շաբաթների ընթացքում տեղի ունեցած իրադարձությունների, երբ համանման բողոքի ակցիաները վերաճեցին ցուցարարների և ոստիկանների միջև բախումների:
Հարցումների համաձայն` սլովենացիների մեծ մասը (53%) աջակցում են հակակառավարական ցույցերին:
