Ադրբեջանական trend.az լրատվական կայքի հաղորդմամբ, Ադրբեջանի արտգործնախարարությունն իր աջակցությունն է հայտնել ԵԱՀԿ Մինսկի խմբի համանախագահների ուղերձին, որում կոչ էր արվում զերծ մնալ Լեռնային Ղարաբաղում ու նրան հարակից շրջաններում ցանկացած տիպի գործունեություն ծավալելուց, որը կհանգեցնի դրանց ժողովրդագրական, սոցիալական, ինչպես նաև մշակութային բնույթի փոփոխություններին:
Ադրբեջանի ԱԳՆ-ի հայտարարությունում նշված է. «Ադրբեջանը հավատում է, որ միջազգային հանրությունը կաջակցի իրեն կորուսյալ տարածքների վերադարձի հարցում: Ադրբեջանը համաձայն է միջազգային հանրությունում գերակա այն կարծիքի հետ, որ եթե հայկական զորքերը դուրս բերվեն «օկուպացված» տարածքներից, և վերականգնվի Ադրբեջանի տարածքային ամբողջականությունը, ապա այդ դեպքում լրջորեն կնվազի տարածաշրջանին սպառնացող վտանգը, պայմաններ կստեղծվեն ոչ միայն անհատի խաղաղ գոյության, այլև զարգացման ու առաջընթացի համար»:
Հիշեցնենք, որ ԵԱՀԿ Մինսկի խմբի համանախագահները նախորդ տարվա հոկտեմբերի 7-13-ը դիտարկումներ էին անցկացրել Լեռնային Ղարաբաղին հարակից, հայկական ուժերի վերահսկողության տակ գտնվող 7 շրջաններում: