ԱՄՆ Ծովային հետևակի զինծառայող, սերժանտ Ջոզեֆ Չեմբլինը դատապարտվել է 30-օրյա կալանքի՝ Աֆղանստանում գրոհայինների դիակները ծաղրելու պատճառով: Նման վճիռ է կայացրել Զինվորական դատարանը: Դատական նիստը տեղի է ունեցել Հյուսիսային Կարոլինայի Քեմփ-Լեժեն ամերիկյան ռազմաբազայում: Այս մասին հայտնում է ITAR-TASS-ը:
Բացի այդ, դատարանը պարտավորեցրել է Չեմբլինին 2000 դոլարի չափով տուգանք վճարել և նրա կոչումն իջեցրել է երեք աստիճանով: Ավելի վաղ զինծառայողն իրեն մեղավոր էր ճանաչել զինվորական պարտականությունը խախտելու, ենթակաների վերահսկման իր պարտականությունները ոչ պատշաճ կատարելու և հակառակորդի դիակները ծաղրելու մեջ:
Նրա դեմ պատժաչափը պետք է լիներ ավելի մեղմ՝ 500 դոլարի տուգանք և կոչման մեկ աստիճանով իջեցում: Հենց այսպիսի առավելագույն պատժաչափի մասին է խոսվել մինչդատական համաձայնագրում, որը կնքվել է ԱՄՆ Ծովահետևակային կորպուսի հրամանատարության հետ: Ինչպես պարզվել է՝ վճիռը կայացրած դատավորը չի իմացել այդ պայմանավորվածության մասին :
Չեմբլինը 4 ամերիկացի զինծառայողների հետ ծաղրել է թալիբների դիակները Հելմանդ գավառում` 2011-ի հուլիսին: Համացանցում հայտնված տեսանյութը համընդհանուր վրդովմունք էր առաջացրել: ԱՄՆ պետքարտուղար Հիլարի Քլինթոնն ու Պենտագոնի ղեկավար Լեոն Պանետան այն ժամանակ վճռականորեն դատապարտել էին ծովահետևակայինների վարքը:
Գործ է հարուցվել նրանցից երկուսի՝ Չեմբլինի և Էդվարդ Դիպտոլի դեմ: Վերջինիս դեմ վճիռը դեռևս չի կայացվել: Մյուս երեքի դեմ օգոստոսին կիրառվել է վարչական տույժ:
