Գերմանիայի կառավարությունը որոշում է ընդունել թուրք ձեռնարկատերերի համար այցագրային ընթացակարգերի հեշտացման վերաբերյալ: Ինչպես տեղեկացնում է Hürriyet-ը, բացի այն, որ գերմանական այցագիրը թուրք գործարարների համար պատրաստ կլինի ընդամենը երկու օրում, նաև թույլ կտա նրանց ԵՄ-ում գտնվել առնվազն 2 տարի: Ծանուցմամբ համապատասխան նամակը Բեռլինի պաշտոնյաներն ուղարկել են թուրք-գերմանական առևտրաարդյունաբերական պալատ:
Նոր այցագրերը կսկսեն գործել 2013-ի հունվարի 1-ից: Պաշտոնական Բեռլինի նման որոշումն առաջին հերթին պայմանավորված է երկու պետությունների միջև առևտրային հարաբերությունների ակտիվ զարգացման մտադրություններով: Սակայն թուրք լրագրողները նրանում տեսնում են ԵՄ պաշտոնյաների կողմից Թուրքիայի վերջին դրական ազդանշանների հետք: Այդ ազդանշանները վերաբերում էին այդ կառուցում Թուրքիայի անդամագրության մտադրություններին:
Նշենք, որ երկու պետությունների միջև առևտրաշրջանառությունը վերջին տարիներին աճել է մինչև 40 միլիարդ դոլարի, որից 17.29 միլիարդը բաժին է ընկնում թուրքական կողմի արտահանումներին, մնացած մասը՝ դեպի Թուրքիա Գերմանիայի արտահանումներին: Բացի այդ, գերմանական ընկերությունների թիվն այդ մերձավորարևելյան երկրում 2012-ի դրությամբ հասել է 5000-ի: 2004 թվականին դրանց թիվը ընդամենը 500-ն էր:
