Չեխիայի նախագահ Վացլավ Կլաուսն այսօր պաշտոնանկ է արել պաշտպանության նախարար, 37-ամյա Կարոլինա Պիկին, ով այդ գերատեսչության ղեկավարի պաշտոնը զբաղեցնում էր դեկտեմբերի 12-ից: Այս որոշման մասին հաղորդել է երկրի ղեկավարի ներկայացուցիչը:
Պաշտոնանկության պատճառների մասին դեռ տեղեկություններ չկան:
Բացի պաշտպանության նախարարի պաշտոնից, Կարոլինա Պիկը զբաղեցնում է փոխվարչապետի պաշտոնն ու ղեկավարում է «Լիբերալ դեմոկրատներ» կուսակցությունը:
Նրա թեկնածությունը ՊՆ ղեկավարի պաշտոնում առաջադրել էր վարչապետ Պետր Նեչասը և որոշակի վերապահումներով պաշտպանել էր նախագահ Կլաուսը: «Նա կասկած էր հայտնել, որ այդ աղջիկը կարող է ընդհանուր լեզու գտնել զինվորականների հետ»,- նշել է նախագահի ներկայացուցիչը:
Պիկը փոխարինել է հրաժարական տված Ալեքսանդր Վոնդրին, ով ՊՆ-ն ղեկավարում էր 2010-ից: Նախագահի հետ զրույցում նա խոստացել էր շարունակել իր նախորդի քաղաքականությունը, այդ թվում՝ նաև կադրային: Սակայն, իր պաշտոնավարման առաջին իսկ օրերի ընթացքում նա աշխատանքից հեռացրել էր իր տեղակալ, գեներալ Վլաստիմիլ Պիցեկին, ինչը առաջացրել էր նախագահի ու վարչապետի դժգոհությունը: Պիկն իր այս քայլը բացատրել էր նրանով, որ Չեխիայի ՊՆ-ում, եվրոպական այլ ՊՆ-երի օրինակով, պետք է աշխատեն քաղաքացիական անձինք:
