Այսօր տեղի է ունեցել ՀՀԿ գործադիր մարմնի նիստը, որը վարել է Հայաստանի նախագահ, ՀՀԿ առաջնորդ Սերժ Սարգսյանը: Նիստը տևել է մոտ 2,5 ժամ, որից հետո ՀՀԿ խոսնակ, ԱԺ փոխնախագահ Էդուարդ Շարմազանովը լրագրողներին տեղեկացրել է, որ անցած շաբաթ կայացած ՀՀԿ 14-րդ համագումարում պատվիրակներին բաժանվել էր նախագահի նախընտրական ծրագրի նախագիծը, որի շուրջ էլ ներկայացվել էին առաջարկներ: Միաժամանակ նախագահը ներկայացրել է մոսկովյան իր աշխատանքային այցը:
Անդրադառնալով Ազգային ժողովում լրագրող Մհեր Արշակյանի և պատգամավոր Մհեր Սեդրակյանի միջև տեղի ունեցած միջադեպին՝ Շարմազանովը նշել է, որ այդ հարցը կուսակցության գործադիր մարմնի նիստում չի քննարկվել:
«Մհեր Արշակյանը դիմել է էթիկայի հանձնաժողով, որը ապաքաղաքական մարմին է, և հարցը կքննարկվի: Իսկ ՀՀԿ-ն իր դիրքորոշումն արդեն արտահայտել է: Ես և իմ գործընկերները ներողություն ենք խնդրել: Բացի այդ, այսօր Մհեր Արշակյանը հանդիպել է ԱԺ նախագահ Հովիկ Աբրահամյանի հետ։ Անկախ ամեն ինչից՝ նման միջադեպերը չեն կարող ստվեր գցել ՀՀԿ համակարգային բարեփոխումների վրա»,- ասել է Շարմազանովը: Վերջում նա շնորհակալություն է հայտնել բոլոր լրատվամիջոցներին՝ ՀՀԿ-ի հետ համագործակցելու և աշխատելու համար:
