ԵԱՀԿ Մինսկի խմբի համանախագահները Հայաստանի ու Ադրբեջանի ԱԳ նախարարների հետ քննարկել են Փարիզում պետությունների ղեկավարների հանդիպման նախապատրաստությունը՝ ասվում է ԵԱՀԿ մամլո հաղորդագրությունում: Այս մասին փոխանցում է Trend գործակալությունը:
Նյու Յորքում հանդիպման ընթացքում Մինսկի խմբի համանախագահներ Իգոր Պոպովը(Ռուսաստան), Ջեյմս Ուորլիքը (ԱՄՆ) և Պիեր Անդրիոն (Ֆրանսիա) հանդիպել են Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հետ և քննարկել երկու պետությունների ղեկավարների՝ հոկտեմբերի վերջին նախատեսված հանդիպման նախապատրաստման հարցերը:
ԵԱՀԿ գործող նախագահի անձնական ներկայացուցիչ Անջեյ Կասպրշիկը նույնպես ներկա է եղել հանդիպմանը:
Հանդիպման ժամանակ Հայաստանի և Ադրբեջանի նախագահները ծրագրում են շարունակել երկխոսությունը Ղարաբաղյան հակամարտության կարգավորման առանցքային տարրերի շուրջ:
Համանախագահները հույս են հայտնել, որ նախագահներն արդյունավետ քննարկումներ կանցկացնեն՝ հասնելու հակամարտության կարգավորման առաջընթացի: Պիեր Անդրիոն մասնակիցներին համառոտ տեղեկացրել է այն հարցերի մասին, որոնք կարող են ներառվել առաջիկա հանդիպման օրակարգ: Համանախագահներն առաջիկայում տարածաշրջան այցելելու մտադրություն են հայտնել:
Համանախագահները նաև հանդիպել են ԵԱՀԿ նախագահ Դիդիե Բուրկհալթերի հետ՝ քննարկելու ղարաբաղյան հակամարտության խաղաղ կարգավորման գործընթացի զարգացումը: Նրանք նրան տրամադրել են Սոչիում և Ուելսում նախագահների վերջին հանդիպումների մասին հաշվետվություն և հայտնել Փարիզում կայանալիք հանդիպման նախապատրաստության մասին:
