ԱՄԷ-ի քաղաքացու դեմ պետության հանդեպ զրպարտության մեղադրանքներ են առաջադրվել Twitter-ում նրա հրապարակումների համար: Այս մասին ասվում է էմիրաթական The National պարբերականում:
Մեղադրյալը ԱՄԷ-ում «Մուսուլման եղբայրների» բջջի գործով բանտարկյալներից մեկի որդին է:
Դատարանում տղամարդը հայտարարել էր, որ իր հրապարակումներով փորձել է աջակցել 10-ամյա ազատազրկման ժամկետի դատապարտված հորը:
Համաձայն մեղադրանքի՝ նա Twitter-ի միջոցով կառավարության դեմ պայքարի կոչ է արել, վիրավորել դատական իշխանություններին և կեղծ տեղեկատվություն տարածել պետանվտանգության մարմինների կողմից մարդկանց առևանգումների և բանտարկյալների կտտանքների մասին:
ԱՄԷ-ում «Մուսուլման եղբայրների» բջջի դեմ դատն ավարտվել է անցած տարվա հուլիսին: Պետական կառուցվածքի տապալման փորձի մեղադրանքով դատապարտվել է 69 մարդ, ևս 25-ն արդարացվել են: Նրանք բոլորը ԱՄԷ-ի քաղաքացի են: Խմբավորումն անօրինական է ճանաչվել և դատարանի որոշմամբ լուծարվել անցած տարի:
