ԱԺ «Ժառանգություն» խմբակցությունը երկրորդ քառօրյան է, շարունակում է բոյկոտել խորհրդարանի աշխատանքները: Նրանք ոչ միայն չեն այցելում ԱԺ եւ հանձնաժողովների նիստերին, այլ նաեւ՝ չեն մտնում խորհրդարանի շենք: Թե կոնկրետ ինչ պատճառով «Ժառանգությունը» լքեց խորհրդարանի դահլիճը, որեւէ մեկի համար այդպես էլ պարզ չեղավ: Փոխարենը կարճ ժամանակ անց պարզ դարձավ, որ այս բոյկոտն ընդամենը քարոզչական քայլ էր՝ մի քանի օր իրենց վրա ուշադրություն սեւեռելու համար:
Ու թեեւ ««Ժառանգության» » պատգամավորները չեն գալիս խորհրդարան, չեն մասնակցում օրինագծերի քննարկմանն ու քվեարկությանը, սակայն շարունակում են ակտիվորեն օգտվել պատգամավորական իրենց մյուս իրավունքներից: Խոսքը, մասնավորապես, տարատեսակ գործուղումների մեկնելու մասին է, որը, կարելի է ասել, «Ժառանգություն» կուսակցության պատգամավորների համար հոբբի է:
Այն, որ «Ժառանգությունը» խորհրդարանը վերածել է ճամփորդների ակումբի, վաղուց ի վեր հայտնի փաստ է: Բայց որ նրանք այդպես կվարվեին նաեւ բոյկոտի օրերին, պատգամավորների մոտ տարբեր մեկնաբանությունների առիթ էր տվել:
Շատերը կհիշեն, թե փետրվարի 28-ին Րաֆֆի Հովհաննիսյանի բոցաշունչ հայտարարությունից հետո «Ժառանգություն» խմբակցության պատգամավորները ինչպես միանգամից լքեցին դահլիճը՝ լրագրողների հետ զրույցում չբացառելով, որ քննարկումների արդյունքում միգուցե վայր դնեն նաեւ մանդատը:
Եվ ահա խրոխտ բոյկոտից մի քանի օր անց` մարտի 6-ին «Ժառանգություն» խմբակցության պատգամավոր Անահիտ Բախշյանը մեկնեց Օսլո` մասնակցելու երեխաների իրավունքների պաշտպանության հզորացման վերաբերյալ ՄԱԿ-ի կազմակերպած սեմինարի: Թեեւ հրավիրող կողմը հոգացել է ճանապարհածախսը, սակայն օրապահիկը` մոտ 1000 եվրոյի չափով, տրամադրվում է Ազգային ժողովի կողմից։
Բացի այդ, «Ժառանգություն» խմբակցության մեկ այլ պատգամավոր Վարդան Խաչատրյանն աշխատանքային այցով մարտի 8-10 եղել է Ժնեւում` առողջապահության թեմայով կազմակերպված ինչ-որ միջոցառման մասնակցելու համար: Այստեղ եւս մեծ գումարներ են ծախսվել՝ ճանապահի ու օրապահիկի վրա: Առաջիկայում Ստրասբուրգ է պատրաստվում մեկնել Զարուհի Փոստանջյանը:Այս այցը ԱԺ վրա կնստի մոտ 3000 եվրո: Այս օրերին ԱԺ-ում նոր գործուղումներ չեն եղել:
Ի դեպ, 2010 թվականին եւս «Ժառանգությունը» բավական ակտիվ է եղել արտերկրյա գործուղումների հարցում: Ռեկորդակիրը խմբակցության պատգամավոր Վարդան Խաչատրյանն է, որը «Ժառանգությունից» դուրս գալուց հետո, ի դեպ, մնաց ԱԺ խմբակցության կազմում: Նա 8 անգամ է մեկնել գործուղման՝ Թուրքիա, Բուխարեստ, Բելգրադ, Մոսկվա: Նույնքան անգամ ճամփորդել է նաեւ Զարուհի Փոստանջյանը: Այս խմբակցության ղեկավար Ստեփան Սաֆարյանը գործուղման է գնացել 6 անգամ, մոտավորապես՝ յուրաքանչյուր երկու ամիսը մեկ անգամ: Նա եղել է Հելսինկիում, Ռիգայում, Աստանայում, Ֆրանսիայիում, Վարշավայում եւ այլուր:
Խմբակցության քարտուղար Լարիսա Ալավերդյանը 5 գործուղման է մեկնել՝ Լոնդոն, Բրյուսել, Սանկտ-Պետերբուրգ: 5 անգամ գործուղման է մեկնել նաեւ Անահիտ Բախշյանը՝ Հելսինկի, Բանկգոկ, Ժնեւ: Արմեն Մարտիրոսյանը գործուղման է մեկնել 3 անգամ, եղել Բեյրութում, Վարշավայում, եւ միայն Րաֆֆի Հովհաննիսյանն է մեկ անգամ մեկնել գործուղման. նա եղել է Օտտավայում: Ընդ որում, բացի Րաֆֆի Հովհաննիսյանի այցից, մյուսների ժամանակ հիմնականում ճանապարհածախսը եւ օրապահիկը հատկացվել է պետական բյուջեից:
Ուշագրավն այն է, որ վերջերս «Ժառանգություն» կուսակցության փոխնախագահ Ռուբեն Հակոբյանը հայտարարել էր, թե ԱԺ-ում ոչ մի կարեւոր բան էլ տեղի չի ունենում: «Այսպիսի անմակարդակ կրիմինալ ու ոչ պառլամենտական խորհրդարան երբեւէ չենք ունեցել»,- ասել էր նա: Այսինքն՝ կարելի է ենթադրել, որ «Ժառանգության» պատգամավորները չեն այցելում խորհրդարան, քանի որ նրանց համար դահլիճում եւ հանձնաժողովներում սպասվող աշխատանքը կարեւոր չի, այլ կարեւորը ճամփորդություններն են, որոնցից նրանք չեն հրաժարվում:
Իսկ «Ժառանգություն» կուսակցության խորհրդի ընդլայնված նիստում ընդունված վերջին որոշումը փաստում է, որ երկրում ստեղծված արտակարգ իրավիճակը ենթադրում է արտակարգ լուծումներ, ինչին համահունչ եւ երկիրը գահավիժումից զերծ պահելու մտահոգությամբ «Ժառանգությունը» որոշել է «Հնարավոր բոլոր եղանակներով` Ազգային ժողովի ամբիոնից մինչեւ հրապարակ, շարունակել պայքարը հանրապետության ամբողջ իշխանության օրինական ու արտահերթ նորովի ձեւավորման համար»:
«Ժամանակ» օրաթերթ
