ԱՄՆ-ը Բելառուսի իշխանություններին կրկին կոչ է արել հարգել մարդու իրավունքները, դադարեցնել ճնշումը ԶԼՄ-ների և ընդդիմության վրա ու ազատ արձակել քաղբանտարկյալներին: Այս մասին հաղորդում է RIA Novosti-ն՝ վկայակոչելով ԱՄՆ-ի պետդեպարտամենտի պաշտոնական ներկայացուցիչ Վիկտորյա Նուլանդի հայտարարությունը:
Նուլանդը հայտարարել է, որ երկու տարի է անցել, ինչ Բելառուսի կառավարությունը սկսել է ճնշումներ գործադրել քաղաքացիների, ժողովրդավարական ընդդիմության և անկախ ԶԼՄ-ների վրա:
«Մենք հիշում ենք այն քաղղբանտարկյալների մասին, որոնք մնում են ազատազրկման մեջ, և հիշեցնում ենք նրանց անհապաղ և առանց պայմանների ազատ արձակելու պահանջի մասին: Մենք ցավում ենք, որ Բելառուսի ղեկավարությունը շարժվում է մի ուղով, որն ուղղված է ինքնամեկասուցման և քաղաքացիներին ճնշելուն»,- ասել է Նուլանդը:
Հիշեցնենք, որ 2010 թ. դեկտեմբերի 19-ին ընդդիմությունը չարտոնված ցույց է անցկացրել Մինսկում նախագահական ընտրությունների քվեարկության ավարտից հետո, որում հաղթանակ էր տարել երկրի գործող նախագահ Ալեքսանդր Լուկաշենկոն: Անկարգության մասնակիցները փորձել են գրավել Կառավարության տունը: Ցույցը ցրելու ժամանակ ձերբակալվել են հարյուրավոր մարդիկ, ներառյալ՝ ընդդիմադիր առաջնոդներ: Վաշինգտոնն այդ ժամանակ պահանջել էր ազատ արձակել ընդդիմադիրներին և հայտարարել, որ չի ճանաչուն ընտրությունների օրինականությունը:
