Ֆրանսիայում դատարանը մեղադրական դատավճիռ է կայացրել մի բժշկուհու նկատմամբ, որը չի կարողացել կանխել հիվանդի հանցագործությունը:
Սպանության հետաքննության ընթացքում պարզվել է, որ հանցագործությունը կատարել է հոգեբույժի ուշադրության տակ գտնվող հիվանդը` գրում է Le Figaro-ն:
Դատարանի որոշմամբ՝ 58-ամյա Դանիելա Կանարելին բանտում պետք է անցկացնի 1 տարի, թեև դատավիճռը ենթակա է բողոքարկման ու ենթադրում է նաև պայմանական ազատազրկում:
Դատարանը նաև նրան պարտավորեցրել է 7500 դոլար վճարել սպանված թոշակառուի որդիներին:
Չնայած պատժի պայմանական բնույթին` դատավճիռն աննախադեպ է ֆրանսիական դատական համակարգի համար: Սա առաջին դեպքն է, երբ բժիշկը պատասխան է տալիս իր հիվանդի կատարած գործողությունների համար:
Գործի նյութերից պարզվում է, որ 2004թ. մարտին Կանարելիի 43-ամյա հիվանդը՝ Ջոել Հեյլարդը, Գափ քաղաքում կացնով սպանել է 80-ամյա Ժերմեն Տրաբյուկին:
Շիզոֆրենիկ հիվանդը փետրվարի 19-ին Կանարելիի հետ խորհրդատվությունից հետո փախել էր Մարսելի հոգեբուժարանից:
Ի դեպ, սպանված տղամարդը եղել է շիզոֆրենիկի տատիկի սիրեկանը, ոչ թե պատահական մարդ:
