Մեկ օրվա ընթացքում մոտ 45 հազար սիրիացի քրդեր հատել են Թուրքիայի հետ սահմանը`փրկվելով «Իսլամական պետության» գրոհայիններից: Այս մասին թուրքական CNN-Turk հեռուստաալիքի հետ հարցազրույցի ժամանակ հայտարարել է Թուրքիայի փոխվարչապետ Նուման Քուրթուլմուշը:
«Մոտ 45 հազար սիրիացի քրդեր հատել են սահմանը Աքչակալի և Մուրսիտպինարի միջև գտնվող ութ անցակետերից`ուրբաթ օրը մեր սահմանը բացելուց ի վեր»,- ասել է նա:
Հիշեցնենք, որ ուրբաթ օրը մի քանի հարյուր սիրիացիներ ժամանել էին Թուրքիային սահմանակից Շանլիուրֆա գավառի շրջան`փրկվելով գրոհայինների և քրդական ինքնապաշտպանության ուժերի`«փեշմերգա», զինված ստորաբաժանումների միջև պայքարից: Սակայն սահմանապահները ստիպված էին եղել ջրցաններ և արցունքաբեր գազ կիրառել ընդդեմ փախստականների խմբի: Սահմանապահները հայտարարել էին, որ բոլորին չեն կարող Թուրքիա թողնել, որից հետո նրանց ուղղությամբ քարեր են նետվել: Ցուցարարներին հաջողվել է հեռացնել սահմանից, բայց ավելի ուշ սահմանը բացվել է:
