Play Google առցանց խանութին YouTube վիդեոհոսթինգի ինտեգրումից հետո երկու ծառայություններում ընձեռվել է ֆիլմերի առցանց վարձակալման կամ գնման հնարավորություն: Այս մասին հայտնում է LifeNews-ը:
Այժմ հանրությունը YouTube-ում կարող է դիտել արտասահմանյան բարձրորակ ֆիլմեր: Նման ծառայությունը հասանելի է «Կինոսրահ» ալիքում, որտեղ կարելի է իրականացնել որոնում՝ ըստ կատեգորիաների և անվանման: Կինոդիտման արժեքը սկսվում է 1 դոլար 60 ցենտից:
Ֆիլմի վարձակալության և գնման արժեքը կախված է դրա որակից և թարմ լինելուց: Սովորաբար նոր ֆիլմերի վարձույթն ու գնումը ավելի թանկ արժեն, քան շուկայում ավելի վաղ հայտնված կինոնկարները:
Հետաքրքիր է, որ վաճառքի առաջին օրը Google Play-ի և YouTube-ի միջև հակասություններ էին սկսվել: Որոշ ֆիլմեր Google Play-ում հնարավոր է եղել դիտել անվճար: Հակասությունները կարգավորվել են: Ստորագրվել են համաձայնագրեր NBC Universal, Paramount Pictures, Sony Pictures Home Entertainment, Twentieth Century Fox խոշոր կինոընկերությունների և ռուսական ստուդիաների հետ:
