Գեներալ-լեյտենանտ Ալեքսանդր Ստուդենիկինը նշանակվել է Հավաքական անվտանգության պայմանագրի կազմակերպության (ՀԱՊԿ) Միացյալ շտաբի պետ: Այս մասին հայտնում է Interfax-ը՝ հղում անելով ՀԱՊԿ գլխավոր քարտուղար Նիկոլայ Բորդյուժային:
Ստուդենիկինի թեկնածությունն այսօր հաստատել է ՀԱՊԿ պաշտպանության նախարարների խորհուրդը: ՀԱՊԿ Միացյալ շտաբի պետի պաշտոնին նրա թեկնածությունն առաջադրել է ՌԴ Զինված ուժերի գլխավոր շտաբի նոր ղեկավար Վալերի Գերասիմովը:
Մինչև վերջին ժամանակներս Ստուդենիկինը գտնվում էր ցամաքային զորքերի գլխավոր հրամանատարության տրամադրության տակ: Ավելի վաղ նա գլխավորել է Կամչատկայի և Տամանի գվարդիական ստորաբաժանումները: Նա նաև Հյուսիսային Կովկասում ծառայություն է անցել Միացյալ զորքերի խմբավորման կազմում:
ՀԱՊԿ-ը ռազմաքաղաքական միություն է, որը ստեղծվել է 1992 թվականին ձեռք բերված Հավաքական անվտանգության պայմանագրի հիման վրա: Դաշինքի կազմում են Հայաստանը, Բելառուսը, Ղազախստանը, Ղրղըզստանը, Տաջիկստանն ու Ռուսաստանը: ՀԱՊԿ-ի անդամ էր նաև Ուզբեկստանը, սակայն նրա անդամակցությունը դադարեցվել է:
ՀԱՊԿ Միացյալ շտաբը ձևավորվել է 2004 թվականին` որպես ՀԱՊԿ պաշտպանության նախարարների խորհուրդ և կազմակերպության մշտական գործող աշխատանքային մարմին: