Ուկրաինան որոշել է հրաժարվել «Եվրատեսիլ-2015» երգի մրցույթին մասնակցությունից, սակայն ծրագրում է 2016թ. վերականգնել այն: Այս մասին հայտնում է Ուկրաինայի ազգային հեռուստաընկերությունը, որն ամեն տարի Ուկրաինայում անցկացնում էր այդ մրցույթի իր մասնակցի ընտրությունը, եզրափակիչը և մրցույթի հեռարձակումը:
«Ուկրաինայի ազգային հեռուստաընկերությունը Եվրոպական հեռարձակող միության հետ երկկողմ պայմանավորվածությամբ որոշում է ընդունել հրաժարվել «Եվրատեսիլ-2015» երգի մրցույթին մասնակցությունից»,- ասվում է հաղորդագրության մեջ: Հեռուստաընկերությունը հայտնում է, որ այս որոշումը պայմանավորված է երկրում բարդ իրավիճակով, խնայելու անհրաժեշտությամբ և հանրային հեռարձակման անցմամբ:
Հեռուստաընկերությունում հույս ունեն, որ Ուկրաինան մրցույթին չի մասնակցի միայն մեկ տարի և արդեն 2016-ին նորից իր ներկայացուցիչը կունենա «Եվրատեսիլ»-ում:
«Եվրատեսիլ-2015»-ը կանցկացվի Վիեննայում:
