ՀՀ առևտրաարդյունաբերական պալատի, ՀՀ-ում ԻԻՀ դեսպանատան և Զարգացման հայկական գործակալության նախաձեռնությամբ «Երևան Էքսպո» ցուցահանդեսային համալիրում մեկնարկել է իրանական 16-րդ եռօրյա ցուցահանդեսը: Երևան են ժամանել իրանական 36 ընկերությունների ներկայացուցիչներ, որոնք ներկայացնում են շուրջ 10 տարբեր ոլորտներ, ինչպես՝ գյուղատնտեսությունը, կոմունալ ծառայությունները, իրավաբանական ոլորտը, գորգագործությունը, մանրածախ առևտուրը և այլն: Ակնկալվում է, որ ցուցահանդեսից հետո կստեղծվեն համատեղ ընկերություններ, կծնվեն համատեղ լավ գաղափարներ:
Զարգացման հայկական գործակալության փոխտնօրեն Վալերի Շաբանովն «Առաջին լրատվական»-ի հետ զրույցում ասաց, որ աշխատում են շարունակել իրենց համագործակցությունն իրանական գործընկերների հետ, քանի որ Իրանը Հայաստանի առաջնահերթ գործընկերներից մեկն է: «Մենք պատրաստ և ուրախ ենք համագործակցել իրանական ընկերությունների հետ»,- ասաց նա:
Վալերի Շաբանովն անդրադարձավ հայ-իրանական առևտրատնտեսական հարաբերությունների չիրացվող ներուժին: Նրա կարծիքով՝ նման միջոցառումները քիչ են կազմակերպվում: «Որոշ ոլորտներում մենք ունենք իրականացված ներուժ: Օրինակ՝ մանրածախ առևտրի ոլորտում. մեր ցանցը լեփ-լեցուն է իրանական ապրանքներով, որոնք իրենց պահանջարկն ունեն հայ տնտեսուհիների շրջանում: Բայց, իհարկե, կա չիրականացված ներուժ, և մենք աշխատում ենք այդ բացերը լրացնել մեր աշխատանքով, արդյունավետ և նպատակասլաց համագործակցությամբ:
Ես էներգետիկայի ոլորտում եմ տեսնում բաց, չնայած մեծ աշխատանք է կատարվում: Կարող ենք համագործակցել գորգագործության, թեթև արդյունաբերության, կաշվե արտադրության բնագավառում: Իզուր չէ, որ իրանական պատվիրակության կազմում ընդգրկված են նաև իրավաբաններ, որոնք ծանոթացնում են իրանական տնտեսական օրենսդրությանը՝ միևնույն ժամանակ ծանոթանալով մեր օրենսդրությանը՝ արդյունավետ համագործակցության համար»,- ասաց ԶՀԳ փոխտնօրենը:
Դիտարկմանը՝ հնարավո՞ր է, որ հայ-իրանական առևտրատնտեսական հարաբերությունների ողջ ներուժի իրագործմանը խոչընդոտում են Իրանի նկատմամբ գործող պատժամիջոցները, արձագանքեց՝ ասելով. «Ես այս հարցը շատ եմ վերլուծել: Ինձ թվում է, որ շատ քիչ չափով են անդրադառնում, իսկ ավելի կարճ ասած, ես չեմ կարծում, թե պատժամիջոցներն այդքան շատ են ազդում Հայաստանի և Իրանի վրա, չնայած իրավիճակը բավականին հակասական է: Ես լուրջ միտումներ չեմ տեսնում»:
Վալերի Շաբանովի համոզմամբ՝ պետք է լավ ուսումնասիրել իրանցիներին և նրանց արտադրանքը:
Առաջարկում ենք մանրամասներին ծանոթանալ տեսանյութի միջոցով:
