Հայտնի հոլիվուդյան դերասան Մայքլ Դուգլասի որդուն` Քեմերոնին, Փենսիլվանիայի բանտում կալանավորները ծեծի են ենթարկել Թմրանյութերի դեմ պայքարի դեպարտամենտի ներկայացուցիչների հետ համագործակցելու պատճառով: Ծեծի հետևանքով կոտրվել են նրա ձեռքի մատը և ոտքը: Այս մասին հայտնում է CBS հեռուստաալիքը:
Դուգլաս կրտսերը, որը մեկ անգամ է հայտնվել կինոյում՝ հոր և պապի հետ նկարահանվելով «Ընտանեկան արժեքներ» ֆիլմում, 2010 թվականին 5 տարվա ազատազրկման է դատապարտվել՝ մետամֆետամին պահելու և տարածելու համար: Նա բանտում 4.5 տարով ավելացրել է պատիժը՝ թմրանյութեր պահելու համար: Դեռ մինչ առաջին դատավճիռը` նա սկսել էր համագործակցել քննության հետ:
Հեռուստաալիքի տվյալներով՝ բանտային հեղինակությունը 100 դոլար պարգև էր խոստացել յուրաքանչյուրին, ով Դուգլասին վնասվածք կհասցներ ֆուտբոլի բանտային խաղի ժամանակ: Այդ մասին իմանալով՝ Դուգլասը հրաժարվել է խաղին մասնակցել, սակայն դա նրան չի փրկել մարզական արենայից դուրս ծեծվելուց: Տուժածը հաստատում է, որ վնասվածքներ է ստացել հենդբոլ խաղալիս:
Օսկարակիր դերասանի որդին թմրանյութերով տարվել է 13 տարեկանում և թմրադիլեր դարձել այն բանից հետո, երբ հայրը կրճատել է նրա ֆինանսավորումը՝ ի պատասխան այն բանի, որ որդին հրաժարվել է թմրակախվածության դեմ բուժման կուրս անցնել:
